सत्य, सन्तुलन र समाजको पक्षमा
सनराइज खबरका निष्पक्ष समाचार र पछिल्ला ताजा खबरहरू
धनकुटाको साँगुरीगढी गाउँपालिका–६ भेडेटारमा दुर्घटनाग्रस्त SUV बाट प्रहरीले ३४१ किलो गाँजा बरामद गरेको छ। धनकुटाबाट भेडेटारतर्फ जाँदै गरेको गाडी सडकबाट करिब १५ मिटर तल खसेको थियो। दुर्घटनाको खबर पाएपछि पुगेको प्रहरीले गाडीभित्रका बोरामा लुकाइएको गाँजा फेला पारेको र एक जनालाई पक्राउ गरेको जनाएको छ। घटनाबारे जिल्ला प्रहरी कार्यालयले अनुसन्धान गरिरहेको छ।
काठमाडौं । सिन्धुलीको दुधौली नगरपालिकाका प्रमुख दिनेश अधिकारी दनुवार विरुद्ध बलात्कारको मुद्दा दर्ता भएको छ । दनुवार विरुद्ध जिल्ला प्रहरी कार्यालय सिन्धुलीमा १८ वर्षीया बालिकालाई जबरजस्ती करणी गरेको किटानी जाहेरी परेको छ । जिल्ला प्रहरी कार्यालय सिन्धुलीमा बिहीबार १८ वर्षीया एक बालिकालाई जबरजस्ती करणी गरेको भन्दै जाहेरी दर्ता भएको प्रहरीले जनाएको छ । दुधौली नगरपालिकाकै एक होटेलमा काम गर्दै आएकी ती बालिकालाई मेयर दनुवारले करणी गरेको र त्यसबाट शिशु जन्मिएको जाहेरीमा उल्लेख छ । जिल्ला प्रहरी कार्यालय सिन्धुलीका अनुसार बालिकाले गत फागुनमा बच्चा जन्माएकी छिन् । बालिकाले जाहेरी दिए लगत्तै प्रहरीले घटनाको अनुसन्धान अघि बढाएको छ । पीडितको स्वास्थ्य र सुरक्षालाई प्राथमिकतामा राखेर अनुसन्धान अघि बढाइएको प्रहरीले जनाएको छ । प्रहरीका अनुसार मेडिकल रिपोर्ट, डिएनए परीक्षण लगायतका प्रमाण सङ्कलनको प्रक्रिया अघि बढाइएको छ । दनुवार २०७९ सालको को स्थानीय तह निर्वाचनमा नेकपा माओवादी केन्द्रबाट नगर प्रमुखमा निर्वाचित हुनुभएको हो । उहाँ माओवादी केन्द्रको वाग्मती प्रदेश सदस्य समेत हुनुहुन्छ ।
काठमाडौं । नेपाली कांग्रेसकी सांसद माया राई प्रहरीले पक्राउ गरेको छ । स्वर्णलक्ष्मी सहकारीको रकम ठगी मुद्दामा फरार सूचीमा रहनुभएकी राईलाई कपनस्थित घरबाट प्रहरीले शनिबार साँझ पक्राउ गरिएको हो । काठमाडौं उपत्यका अपराध अनुसन्धान कार्यालयको टोलीले राईलाई पक्राउ गरेको हो । उहाँलाई काठमाडौं प्रहरी परिसरमा बुझाइएको छ । नेपाली कांग्रेसको समानुपातिक कोटाबाट निर्वाचित राई भोजपुरकी स्थायी बासिन्दा हुनुहुन्छ ।
काठमाडौं । राप्रपाका वरिष्ठ उपाध्यक्ष रवीन्द्र मिश्रमाथि अनुसन्धान गर्न प्रहरीले फेरि म्याद थपेको छ । मिश्रलाई अदालतले थप ७ दिनको म्याद थप गरेको छ । काठमाडौं जिल्ला अदालतले उहाँमाथि अनुसन्धानका लागि आइतबार पाँचौँ पटक म्याद थपेको हो । गत चैत १५ गते भएको राजावादीहरूको हिंसात्मक आन्दोलनमा जिम्मेवार भएको भन्दै मिश्रसहितका नेतालाई प्रहरीले पक्राउ गरी अनुसन्धान गरिरहेको छ ।
काठमाडौँ । सरकारी कार्यालय, स्थानीय तह, बैंक तथा वित्तीय संस्था, शैक्षिक प्रमाणपत्रलगायत कागजात किर्ते गरी नक्कली बनाउने गिरोहका तीन जना पक्राउ परेका छन् । काठमाडौँ उपत्यका अपराध अनुसन्धान कार्यालयको टोलीले काठमाडौँको तारकेश्वर नगरपालिका-७ फुटुङबाट उनीहरूलाई पक्राउ गरेको हो । प्रहरीले नक्कली कागजात बनाउने गोरखाको भीमसेन गाउँपालिका-१ मसेलकी ४६ वर्षीया अञ्जनी बयलकोटी, ओखलढुङ्गाको चम्पादेवी गाउँपालिका-७ का २८ वर्षीय निर्मल खड्का र मकवानपुरको कैलाश गाउँपालिका-२ छ्याङ्ढुङका २३ वर्षीया अञ्जु खत्रीलाई किर्ते कागजातसहित पक्राउ गरेको हो । निजहरूलाई आवश्यक कारबाहीका लागि आज जिल्ला प्रहरी परिसर काठमाडौँ पठाइएको कार्यालयका प्रवक्ता काजीकुमार आचार्यले जानकारी दिनुभयो । उहाँका अनुसार पक्राउ परेकी बयलकोटीले आठ वर्षदेखि सरकारी तथा गैरसरकारी कार्यालयका कागजात, विभिन्न स्थानीय तहको सिफारिस पत्र, विभिन्न शैक्षिक संस्थाका प्रमाणपत्र, जग्गाधनी पुर्जा, सवारीचालक अनुमतिपत्रलगायत कागजात किर्ते गरी प्रयोग तथा प्रचलनमा ल्याउने गरेको अनुसन्धानबाट खुलेको छ । निजले फुटुङमा कोठा भाडामा लिई नक्कली कागजात डिजाइन गर्न दुई जना सहयोगीलाई मासिक रु १० देखि रु १५ हजारसम्म तलब दिई कार्यालय सञ्चालन गरेकी पाइएको प्रहरीले जनाएको छ । बैंकबाट ऋण लिने प्रयोजनार्थ नक्कली जग्गाधनी पुर्जा बनाइदिने गरेको अनुसन्धानबाट खुल्न आएको प्रवक्ता आचार्यले जानकारी दिनुभयो । उहाँका अनुसार पक्राउ परेकाहरूले विद्यार्थी भिसामा जापान जानेहरूका लागि सहकारी संस्थाका ‘स्टेटमेन्ट’समेत बनाएर कुरियरमार्फत पठाउने गरेका पाइएको छ । उनीहरूले विभिन्न शैक्षिक संस्था तथा सरकारी कार्यालयका ‘होलोग्राम’हरू आवश्यकताअनुसार उपलब्ध गराउने, जापानलगयत विभिन्न देशमा कामदार भिसामा जानका लागि विभिन्न तहको शैक्षिक प्रमाणपत्र तथा अनुभवपत्र बनाइदिने गरेको अनुसन्धानबाट खुलेको छ । प्रहरीले उनीहरूका साथबाट नक्कली जग्गाधनी प्रमाणपुर्जा, विभिन्न तहका शैक्षिक प्रमाणपत्र, बैंक तथा सहकारीका लेटरप्याड, छाप, कम्प्युटर, प्रिन्टरलगातय सामग्री बरामत गरेको छ । -रासस
काठमाडौँ । नेपाल प्रहरीले ४० किलोग्राम लागुऔषध गाँजासहित पाँच जनालाई पक्राउ गरेको छ । जिल्ला प्रहरी परिसर काठमाडौँका सूचना अधिकारी अपिलराज बोहराका अनुसार पक्राउ पर्नेमा धादिङ गजुरी–४ का निराजन चेपाङ, प्रकाश चेपाङ र शङ्कर चेपाङ, काठमाडौँ महाराजगञ्जका जीवन प्रजा र सुमन चेपाङ रहेका छन् । उनीहरूको साथबाट प्रहरीले रु एक लाख २५ हजार नगदसमेत बरामद गरेको छ । उनीहरूले काठमाडौँ कोटेश्वरस्थित सुननम चेपाङको डेरामा लुकाइछिपाई राखेको अवस्थामा सो परिमाणको गाँजा राखेको र बिक्री वितरण गरेको प्रहरीको भनाइ छ । चोरी तथा डाँका मुद्दामा संलग्न दुई जना पक्राउ नेपाल प्रहरीले चोरी तथा डाँका मुद्दामा संलग्न दुई जनलाई पक्राउ गरी आवश्यक कारबाहीका लागि प्रक्रिया अगाडि बढाएको छ । प्रहरीका अनुसार २०८१ चैत २९ गते पोखराको अम्मरसिंह चोकबाट लेखनाथतर्फ जाँदै गरेको बसमा सवार एक महिलाले घाँटीमा लगाएको दुई तोलाको सुनको सिक्री पोखरा महानगरपालिका–१० शिवचोकबाट उनीहरूले लुटपाट गरेका थिए । सो अभियोगमा काभ्रेपलाञ्चोक बेथानचोकका अञ्जन तामाङ र काठमाडौँ गोकर्णेश्वरका सुरेश तामाङलाई पक्राउ गरेको छ । उनीहरूलाई काठमाडौँ गोकर्णेश्वर–४ बाट पक्राउ गरी थप कारबाहीका लागि जिल्ला अदलातबाट म्याद थप गरी अनुसन्धान भइरहेको छ । -रासस
काठमाडौं । सर्लाहीको बागमती नगरपालिकाका मेयर भरतकुमार थापा भ्रष्टाचार र गैरकानूनी सम्पत्ति आर्जन गरेको मुद्दामा दोषी ठहर भएका छन् । विशेष अदालतका अध्यक्ष न्यायाधीश टेकनारायण कुँवर, सदस्य न्यायाधीश मुरारीबाबु श्रेष्ठ र विदुर कोइरालाको इजलासले थापासहित ६ जना विरुद्धको मुद्दामा थापासहित विमलकुमार पोखरेल र सागर पौडेललाई दोषी ठहर गरेको हो । अदालतका अनुसार बागमती नगरपालिकामा मूल्य अभिवृद्धि कर सहित ३० करोड २९ लाख ३४ हजार ८९७ रुपैयाँ ४० पैसा बराबरको नदीजन्य पदार्थको हानिनोक्सानी गरेको ठहर छ । अदालतले मेयर थापासहित ३ जनालाई भ्रष्टाचार निवारण ऐन, २०५९ को दफा १७ अन्तर्गतको कसूरमा दोषी ठहर गर्दै सजाय निर्धारणका लागि यहि साउन २९ गते पेशी तोकेको छ । त्यसैगरी, प्रतिवादी लिलाकुमारी मोक्तान, विश्वराज पोखरेल र मेथुर चौधरीलाई आरोप अनुसारको कसूर प्रमाणित नदेखिएकाले सफाइ दिएको छ । यस्तै अदालतले मेयर भरतकुमार थापालाई गैरकानूनी सम्पत्ति आर्जन गरेको मुद्दामा पनि दोषी ठहर गरेको छ । थापाको सम्पूर्ण आय र व्यय मूल्याङ्कन गर्दा उनको कुल आय ९ करोड १४ लाख ३१ हजार रुपैयाँ ९१ पैसा रहेकोमा कुल व्यय १२ करोड ५९ लाख ५३ हजार रुपैयाँ १४ पैसा रहेको देखिएको फैसलामा उल्लेख छ । यसअनुसार थापाले ३ करोड ४५ लाख २२ हजार ३८७ रुपैयाँ २३ पैसा बराबरको सम्पत्ति गैरकानूनी रुपमा आर्जन गरेको प्रमाणित भएकोले उनलाई एक वर्ष कैद र त्यति नै बराबरको जरिवाना हुने ठहर अदालतले गरेको छ ।
धनगढी । कैलाली कारागारभित्र दैनिक उपभोग्य सामान जस्तै तरकारी, नास्ता, ग्यास, साबुन, सोडा लगायतका सामग्रीको बिक्री–वितरण आन्तरिक प्रशासनको जिम्मेवारीमा रहेको पाइएको छ। कैदीबन्दीका लागि आवश्यक यी सामग्री आपूर्ति गर्न कानुनले कारागारभित्रै पसल राख्न र सञ्चालन गर्न सकिने व्यवस्था गरेको छ। स्रोतका अनुसार, कैलाली कारागारभित्र सञ्चालित यस्ता पसलमार्फत मासिक पाँच लाख रुपैयाँभन्दा बढीको आम्दानी हुने गरेको छ। यही आर्थिक स्वार्थका कारण पछिल्लो समय कारागारभित्र पसल कब्जा गर्ने विषयलाई लिएर विवाद उत्पन्न भएको जनाइएको छ। ‘कारागारभित्र व्यापार गर्नेले मासिक पाँच लाखभन्दा बढी कमाउँछन्,’ स्रोतले भन्यो, ‘त्यही आम्दानीको स्रोत कब्जा गर्नेलाई लिएर झडप भएको हो।’ सञ्चालन हुने पसलहरूबाट चिया, खाजा, नास्ता, दैनिक उपभोग्य सामग्री लगायतका वस्तुहरू कैदीबन्दी र सुरक्षाकर्मीलाई आपूर्ति गरिन्छ। तर, यस्ता पसलहरूको व्यवस्थापन पारदर्शी ढंगले नभएको, विशेष पहुँच भएका समूहको मात्र नियन्त्रणमा रहने गरेको आरोप लाग्दै आएको छ।
रौतहट । रौतहटको मुडवालवा सडकमा सुटकेशभित्र महिलाको शव फेला परेको छ । गौर–सिरसिया सडकखण्ड अन्तर्गत मुडवालवा मोड नजिकको सडकमा शव सहितको सुटकेश फेला परेको प्रहरीले जानकारी दिएको छ । प्रहरीका अनुसार डोरीले बाँधिएको अवस्थामा फेला परेको सो सुटकेश खोलेपछि भित्र महिलाको शव रहेको देखिएको हो । गौर नगरपालिका वडा नम्बर ९ पर्ने सो सडकमा शनिबार राती १०ः३० बजे शकास्पद सुटकेश फेला परेको जिल्ला प्रहरी कार्यालय रौतहटका डिएसपी राजन कार्कीले बताउनुभयो । उहाँका अनुसार प्रहरी टोलीले आज (आइतबार) बिहान सो सुटकेस खोलेर हेर्दा अन्दाजी ३० वर्षीया एक महिलाको शव भेटिएको हो । मृतक महिलाको अहिलेसम्म कुनै पहिचान हुन नसकेको र अनुसन्धान जारी रहेको समेत उहाँले जानकारी दिनुभयो । शवमा साडी छिरिएको देखिएकाले महिलाको हत्या गरी सुटकेशमा हालिएको हुन सक्ने प्रहरीको प्रारम्भिक अनुमान छ । घटनाका बारेमा थप अनुसन्धान गर्न प्रहरीले घटनास्थल नजिकै रहेको एक विद्यालयको सीसीटीभी जाँच गरिरहेको छ । प्रहरीले महिलाको शवलाई प्रादेशिक अस्पताल गौरमा पठाएको छ । यस अघि गौर–५ मा छुरा प्रहारबाट मारिएका सहाबुदिन मिया र सप्तरीका उपेन्द्र भगतको एक होटलमा शव फेला परेको थियो । यो साता मात्रै रौतहटमा तीन जनाको शव फेला परिसकेको छ ।
