सत्य, सन्तुलन र समाजको पक्षमा
सनराइज खबरका निष्पक्ष समाचार र पछिल्ला ताजा खबरहरू
काठमाडौं उपत्यकामा दशैंका लागि गरिएको सबै ब्रान्डको सिलिन्डर साटासाट तथा संयुक्त बिक्री बुधबार, अक्टोबर १४ सम्म चल्ने र बिहीबारबाट नियमित डिलर प्रणाली फर्कने एलपी ग्यास उद्योग संघले जनाएको छ। उपभोक्ताले कुनै ब्रान्डको खाली सिलिन्डर तोकिएका ११ बिक्री केन्द्रमा साट्न पाउँथे, तर लामो लाइन र टाढाका केन्द्रका कारण असुविधा भएको थियो। आयात र आपूर्ति सामान्य रहेको संघको दाबी छ; बिहीबारदेखि नजिकका डिलरबाट ग्यास लिन आग्रह गरिएको छ।
नेपाल र अमेरिका मिलेनियम च्यालेन्ज कर्पोरेसन (MCC) अन्तर्गतका आयोजनाको कार्यान्वयन अवधि एक वर्षसम्म थप्ने सहमतिनजिक पुगेको अर्थ मन्त्रालयका स्रोतहरूलाई उद्धृत गर्दै समाचारमा जनाइएको छ। अमेरिकी वैदेशिक सहायता पुनरावलोकन र त्रिशूली क्षेत्रमा आएको बाढीका कारण काम प्रभावित भएपछि समय थप्ने विकल्प छलफलमा आएको हो। नेपालमा सम्झौता २०२३ अगस्ट ३० मा कार्यान्वयनमा आएको थियो र हालको समयसीमा २०२८ अगस्टसम्म छ; अन्तिम सहमति भने घोषणा भइसकेको छैन।
मलेसियाले नोभेम्बर ५ देखि नेपालबाट कामदार भर्ना गर्न नयाँ प्रणाली लागू गर्ने भएको छ। प्रणाली सञ्चालक Bestinet ले मलेसियाको मानव संसाधन मन्त्रालयको पत्रका आधारमा मिति तोकिएको जानकारी भर्ती एजेन्सी र स्वास्थ्य परीक्षण केन्द्रलाई दिएको छ। समाचारअनुसार नयाँ व्यवस्थामा २५ Principal Recruitment Agency र तिनका २५० Associate Recruitment Agency गरी २७५ एजेन्सीको सञ्जालमार्फत प्रक्रिया सञ्चालन हुनेछ। नयाँ प्रणालीमा बायोमेडिकल दर्ता पनि मुख्य एजेन्सीमार्फत सुरु गरिनेछ।
बुधबार शेयर बजार मापक नेप्से परिसूचक ६.३८ अंक घटेर २,५७२ विन्दुमा बन्द भएको छ। बजार घटे पनि कारोबार रकम अघिल्लो दिनको ३ अर्ब १३ करोड रुपैयाँबाट बढेर ३ अर्ब ७४ करोड पुगेको छ। समाचारअनुसार ९९ कम्पनीको शेयर मूल्य बढ्दा १६७ कम्पनीको घट्यो र १३ कम्पनी स्थिर रहे। बैंकिङ समूहबाहेक सबै क्षेत्रका सूचक घटे; बैंकिङ सूचक भने ०.०८ प्रतिशतले बढेको थियो।
दसैंलगायत चाडपर्वलाई लक्षित गर्दै नेपाल राष्ट्र बैंकले बैंक तथा वित्तीय संस्थालाई ATM मार्फत नयाँ रु १०० दरका नोट उपलब्ध गराउन निर्देशन दिएको छ। केही संस्थाले नयाँ मोडलका ATM बाट नोट वितरण सुरु गरिसकेको समाचारमा उल्लेख छ। राष्ट्र बैंकका प्रवक्ताका अनुसार सफा नोट बैंक र राष्ट्र बैंकबाट लिन सकिने व्यवस्था गरिएको छ। वितरणबारे छुट्टै प्रचार वा सूचना जारी नगरी सर्वसाधारणलाई सहज रूपमा नोट उपलब्ध गराउने नीति लिइएको छ।
काठमाडौँ । अन्तरराष्ट्रिय बजारमा सुनको मूल्य बढेसँगै त्यसको प्रभाव स्थानीय बजारमा पनि परेको छ । बुधबारदेखि पहेँलो धातुको मोल निरन्तर बढेको छ । आज तोलामा रु एक हजार ७०० ले वृद्धि भएको छ । चाँदी पनि तोलामा रु ३५ ले बढेको छ । नेपाल सुनचाँदी व्यवसायी महासङ्घका अनुसार आज एक तोला सुनको मूल्य रु एक लाख ९१ हजार ५०० कायम भएको छ भने त्यति नै परिमाणको चाँदी रु दुई हजार २५ मा कारोबार भइरहेको छ । अन्तरराष्ट्रिय बजारमा आज प्रतिऔँस सुन तीन हजार ३५५ डलरमा कारोबार भइरहेको अन्तरराष्ट्रिय सञ्चारमाध्यमहरुले जनाएका छन् । –रासस
काठमाडौं । अन्तरराष्ट्रिय बजारमा भएको सुनको मूल्यवृद्धि, आकाशिदो डलर मूल्य, आन्तरिक माग व्यवस्थापनलगायत कारण स्थानीय बजारमा सुनको मूल्य हरेक दिन नयाँ उचाइ कायम गरिरहेको छ । गत शुक्रबार हालसम्मकै उच्च अङ्कको पुगेको सुनको मूल्य हिजो आइतबार पनि बढेको थियो । आज फेरि नयाँ उचाइमा पुगेको छ । आइतबार प्रतितोला रू एक लाख ७६ हजार आठ सय कायम भएको सुनको मूल्य आज तोलामा रू एक हजार एक सय बढेर रू एक लाख ७७ हजार नौ सय कामय भएको नेपाल सुनचाँदी व्यवसायी महासङ्घले जनाएको छ । त्यस्तै, आज चाँदीको मूल्य प्रतितोला रू १० बढेर रू दुई हजार ३५ पुगेको छ । अन्तरराष्ट्रिय बजारमा आज सुन प्रतिऔंस तीन हजार ११४ अमेरिकी डलर हाराहारीमा कारोबार भइरहेको छ । –रासस
काठमाडौं । नेपाल स्टक एक्सचेन्ज (नेप्से) को प्रमुख (सीईओ) मा नारद लुईंटेल नियुक्त हुनुभएकाे छ । सोमबार साँझ बसेको मन्त्रिपरिषद् बैठकले लुईंटेललाई नेप्सेको सीईओमा नियुक्त गरेकाे हाे ।
काठमाडौं । नेपाल बीमा प्राधिकरणका अध्यक्ष शरद ओझाले बीमा क्षेत्रमा दाबी भुक्तानी र मिस सेलिङको समस्या अझै रहेको बताउनुभएको छ । आइतबार इकोनोमिक मिडिया एसोसिएसन नेपाल (इमान)ले आयोजना गरेको अन्तरक्रिया कार्यक्रममा बोल्दै अध्यक्ष ओझाले अन्डराइटिङको समस्यालाई प्रभावकारी रुपमा समाधान गर्न नसकेका कारण बीमा दाबी भुक्तानी र मिस सेलिङको समस्या देखिएको बताउनुभएको हो । यि समस्याहरुबारे प्राधिकरणमा छलफल समेत भइसकेको बताउँदै दीर्घकलिन समाधानको उपाय खोजी भइरहेको उहाँको भनाई छ । अध्यक्ष ओझाले बीमा कम्पनीहरुलाई छरिएर रहेका निर्देशनहरुलाई एकीकृत गरेर जारी गर्ने तयारी रहेको समेत बताउनुभयो । बीमा कम्पनीहरुले भोगिरहेका समस्या समाधान र बीमा उद्योगलाई दिगो रुपमा विकास गर्न सहजता प्रदानको लागि एकीकृत निर्देशन जारी गर्न लागिएको जानकारी पनि दिनुभएको छ । बीमितहरुले भोगिरहेका विभिन्न समस्याको समाधानको लागि पनि बिमकको वित्तीय स्वास्थ्य बलियो हुन आवश्यक रहेको भन्दै उहाँले एकिकृत निर्देशनले जरुरी रहेको बताउनुभयो । उहाँले बीमा प्राधिकरणले हाल नियामकीय व्यवस्थाहरूलाई सुधार गर्न प्रारम्भिक कार्य गरिसकेको जानकारी दिनुभयो । ‘हाम्रो मुख्य उद्देश्य बीमा बजारलाई व्यवस्थित बनाउँदै व्यवसायिक अभ्यास सुधार गर्नु हो’ कार्यक्रममा सम्वोधन गर्दै उनले भने, ‘यसका लागि सरोकारवालाहरूको सहकार्य आवश्यक छ ।’ कार्यक्रममा बोल्दै जीवन बीमक संघका अध्यक्ष तथा नेपाल लाइफ इन्स्यारेन्सका प्रमुख कार्यकारी अधिकृत प्रनिण रमन पराजुलीले बीमा ऐ्नलाई समय सापेक्ष बनाउनु आजको आवश्यकता रहेको बताउनुभयो । यसका लागि प्राधिकरणले काम गर्नेमा आफूहरु ढुक्क रहेको उहाँको भनाइ छ । बीमा विज्ञ रबिन्द्र घिमिरेले बीमा प्राधिकरणले जति प्रभावकारी रुपमा कार्यक्रमहरु गर्नुपर्ने हो त्यो हुन नसकेको गुनासो गर्नुभयो । एउटा कर्मचारीले सानो गल्ती गर्दा अर्बौंको जोखिम इन्सुरेन्सको थाप्लोमा आउने कारण प्राधिकरणले दक्ष जनशक्तिको उत्पादनको लागि गम्भिर रुपमा सोच्न आवश्यक रहेको धारणा पनि राख्नुभयो । यस्तै,इमान अध्यक्ष रोयल आचार्यले बीमाको इतिहास लामो भएपनि अझै धेरै नागरिकको माझमा बीमाको पहुँच पुर्याउन बाँकी रहेको औंल्याउनुभयो । कार्यक्रममा बोल्दै निर्जिवन बीमक संघका महासचिव सुनिल बल्लभ पन्त, लघुबीमक संघका सचिव नरेश रोक्का, नेपाल राष्ट्र बैंकका पूर्वकार्यकारी निर्देशक समेत रहेका सानिमा रिलाइन्स लाइफ इन्स्योरेन्सका प्रमुख कार्यकारी अधिकृत शिवनाथ पाण्डेलगायतले प्राधिकरणको नेतृत्वमा युवा पाउँदा आफूहरु खुसी भएको बताउनुभयो । इमानले प्राधिकरणको अध्यक्ष नियुक्त भएकोमा ओझालाई सम्मान समेत गरेको छ । इमान अध्यक्ष रोयल आचार्यले प्राधिकरणका अध्यक्ष ओझालाई सम्मानपत्रसहित सम्मान गर्नुभयो । आइतबार इमानले प्राधिकरणका नवनियुक्त अध्यक्षको सम्मान तथा ‘अबको बीमा क्षेत्र’ विषयक अन्तरक्रिया गरेको हो ।
