काठमाडौं । प्रतिनिधिसभाको विकास तथा प्रविधि समितिले पप्पु कन्स्ट्रक्सनलाई कारबाही गर्न सरकारलाई निर्देशन दिएको छ।
पप्पु कन्सट्रक्सनले तीनकुनेस्थित बागमती नदीको पुल निर्माणमा गम्भीर त्रुटि गरेको भन्दै समितिले कारबाही गर्न निर्देशन दिएको हो । समितिले स्थलगत अध्ययन प्रतिवेदन सार्वजनिक गर्दै उक्त पुल निर्माणमा पप्पुले गम्भीर त्रुटि गरेको निष्कर्ष निकालेको हो ।
समिती सभापति कल्याणी कुमारी खड्काको नेतृत्वमा समितिले यही २ जेठमा पुलको स्थलगत अनुगमन गरेको थियो । काम अघि नबढाउन निर्देशन दिँदा पनि अटेर गरी निर्माण प्रक्रिया अघि बढाएको निष्कर्ष निकाल्दै समितिले कारवाही गर्न सरकारलाई निर्देशन दिएको हो ।
अनुगमनको क्रममा उक्त पुल अरनिको राजमार्गको तीनकुनेस्थित बाग्मती नदीको बायाँतर्फ निर्माण भइरहेको छ। पुलको लम्बाइ ८६ मिटर र चौडाइ १७.२० मिटर रहेको छ। पुलको २९.५ मिटर गहिरो (लम्बाइ)का १६ वटा १२ सय एमएमका पाइल्स निर्माण गर्र्ने डिजाइन स्वीकृत भए पनि पप्पुले एउटा पाइल १६.५ मिटरको मात्र निर्माण गरेको र दुईवटा पाइल्स क्र्याक भएको प्राविधिक परीक्षणबाट देखिएको समितिले जनाएको छ।
निर्माणाधीन पुलको ३ वटा पाइल्समा गम्भीर त्रुटी देखिए पछि काठमाडौ उपत्यका सडक विस्तार आयोजनाले निर्माण व्यवसायीलाई फाउन्डेसनमा रहेको पाइल्सको समस्या समाधान गरेर मात्र काम अगाडि बढाउन निर्देशन दिएको थियो ।
तर, व्यवसायीले उक्त निर्देशनको पालना नै नगरी पुलको सव–स्ट्रक्चर निर्माण गरी स्ल्याब ढलानको तयारी गरेको समितिले जनाएको छ ।
त्यस्तै अनुगमनका क्रममा पुल निर्माणका लागि नदीमा ठड्याइएका फलामका फर्माले बस्ती डुबानमा परेको भन्दै फर्मा हटाउन निर्देशन दिएको छ ।
आयोजना निर्माणपूर्व सडक विस्तार आयोजनाले पूर्वतयारी नगरेको, ढल, खानेपानीको पाइप, बिजुलीको पोल हटाउनै ६ महिना लागेको र सोही कारण काम समयमै सुरु हुन नसकेको प्रतिवेदनमा उल्लेख छ ।
पुलको समस्या समाधानका लागि इन्जिनियरिंग अध्ययन संस्थानमा डिजाइन पठाएकोमा त्यहाँबाट परिमार्जन भई हालसम्म प्राप्त हुन नआएको प्रतिवेदनमा उल्लेख छ ।
समितिको प्रतिवेदनमा पुल निर्माणका क्रममा तीनकुने खण्डमा निर्माण गरिएको संरचनाले मानवीय दुर्घटना हुने सम्भावना देखिएकोले त्यस्ता संरचनाहरुको तत्काल व्यवस्थापनका लागि पनि निर्देशन दिइएको उल्लेख छ ।
