संघीयता सफल हुँदा टाउको दुख्छ भने सिटामोल लिएर हिँड्नू : खिमलाल भट्टराई

काठमाडाैं । राष्ट्रियसभा सदस्य खिमलाल भट्टराईले देशमा अस्थिरता कायम रहरिहोस् भन्ने चाहना राख्ने तत्त्व सक्रिय रहेको बताएका छन् ।

बिहीबार राष्ट्रियसभामा विनियोजन विधेयकमाथिको छलफल क्रममा बोल्दै नेकपाका राष्ट्रियसभाका प्रमुख सचेतकसमेत रहेका भट्टराईले भने, ‘आज हामी विकासतर्फ लम्किँदै गर्दा मलाई के लाग्छ भने अहिले देशमा कतै लोकतन्त्र मजबुत हुने पो हो कि ! भनेर चिन्ता गर्ने तत्व पनि छ ।’

उनले संघीयता कार्यान्वयन भएर अगाडि बढ्छ कि भनेर चिन्ता गर्ने गर्ने तत्व सक्रिय रहेको बताउँदै भने, ‘यो सबै कुरा भताभुंग होस् र त्यसमा हामी खेल्न पाइयोस् भन्ने तत्व पनि हाम्रो बीचमा छ । तर यी सबै कुरा लागू भएर अगाडि बढ्छ ।’

संघीयता कार्यान्वयन भएर देश विकासतर्फ बढ्दा कसैलाई टाउको दुख्छ भने सिटामोल गोजीमा बोकेर हिँड्न उनले सुझाव दिए ।