काठमाडौं । प्रमुख प्रतिपक्षी दल नेपाली कांग्रेसका प्रमुख सचेतक बालकृष्ण खाँडले सर्लाही घटनाको सत्यतथ्य बाहिर ल्याउन सरकार तयार नभएपछि प्रतिनिधिसभा बैठक अवरुद्ध पार्नुपरेको बताएका छन् ।
कांग्रेस प्रमुख सचेतक खाँडले प्रहरीको गोली लागेर सर्लाहीमा मारिएका दुई जनाको घटनाबारे सत्यतथ्य बाहिर ल्याउन छानबिनका लागि संसदीय समिति गठन गर्न माग गर्दा पनि सरकारले नमानेपछि आज पनि प्रतिनिधिसभा बैठक अवरुद्ध पार्नुपरेको जनाए ।
सोमबार संघीय संसद भवन परिसरमा सञ्चारकर्मीहरुले राखेका जिज्ञासाको जवाफ दिने क्रममा उनले नागरिकको जीवन रक्षा गर्ने दायित्व पूरा गर्न सरकारलाई खबरदारी गर्न पनि आफूहरु लागिपरेको स्पष्ट पारे ।
प्रमुख सचेतक खाँडले गैरन्यायिक ढंगले प्रहरीले गोली हानेर मान्छे मार्ने काम भएपछि आफूहरुले मानवअधिकारको रक्षाका लागि पनि त्यसको तथ्य बाहिर ल्याउन सरकारसँग संसदीय छानबिन समिति गठन गर्न माग गर्ने एजेन्डालाई निरन्तरता दिएको बताए ।
सरकार सो घटनालाई ढाकछोप गर्न लागिपरेको आरोप खाँडको छ । प्रमुख सचेतक खाँडले सो घटनाको सत्यतथ्य बाहिर ल्याउन प्रधानमन्त्री केपी शर्मा ओली, सभामुख कृष्णबहादुर महरासँग पनि पटक–पटक छलफल गरे पनि सुनुवाइ नभएको जानकारी दिए ।
