काठमाडौं । राष्ट्रिय जनता पार्टी (राजपा) नेपालका सांसद् राजेन्द्र महतोले नागरिकताका विषयमा आएको समाचारप्रति असन्तुष्टि व्यक्त गरेका छन् ।
सोमबारको प्रतिनिधिसभा बैठकमा विशेष समय लिएर बोल्दै उनले राष्ट्रियतासँग जोडिएको संवेदनशील विषयमा सरकारकाे नियतमाथि प्रश्न उठाए। उनले भने, ‘भ्रमको खेती गरेर सरकारले के गर्न खोजेको हो ? सरकारको नियतमाथि नै प्रश्न उठेको छ ।’
आइतरबारको पत्रकार सम्मेलनमा सरकारका प्रवक्ता गोकुलप्रसाद बाँस्कोटाले राजेन्द्र महतोसहित आठ जना भारतीयले लिएको नेपाली नागरिकता खारेज गरेको बताएका थिए । त्यसपछि सञ्चार माध्यमले राजपा नेता महतोलाई जोडेर समाचार प्रसारण गरेका थिए ।
राज्यको तर्फबाट मानहानि र गलत प्रचार प्रसार गरिएको महतोको भनाइ थियो । उनले भने, ‘भोलि कृष्णबहादुर महरा चाहिँ महाडकैत र उहाँ आजीवन काराबास भए भनेर समाचार आयो भने के हुन्छ ?’
यो विषयमा सञ्चारमाध्यम पनि गैरजिम्मेवार भएको र सरकारले भ्रम फैलाएकोमा माफी माग्नुपर्ने उनले बताए ।
उनले भने, ‘कुन नियतले हो ? यो सरकार चौतर्फी रुपमा असफल त भइरहेकै हो । यो भ्रमको खेती गरेर के गर्न खोजेको हो सरकारले ? राजेन्द्र महतोको राष्ट्रियतामाथिको प्रश्न उठाउँदै भ्रम छर्ने काम यो के गरेको ? सरकारको नियतमाथि नै प्रश्न उठेको छ । सरकारले यसरी भ्रम फैलाउने काम गर्नुहुन्न । मानहानि गर्न पाइँदैन । सरकारले माफी माग्नुपर्छ’ ।
महतोको विवादित अभिव्यक्ति रेकर्डबाट हटाइयो
राजेन्द्र महतोको अभिव्यक्ति प्रतिनिधिसभाको रेकर्डबाट हटाइएको छ । महतोले सभामुख कृष्णबहादुर महरा र नेकपा अध्यक्ष पुष्पकमल दाहाललाई जोडेर विवादित अभिव्यक्ति दिएपछि नेकपाका सांसद खगराज अधिकारी र कृष्णभक्त पोखरेलले नियमापत्ति जनाउँदै रेकर्डबाट हटाउन माग गरेका थिए ।
आफ्नो नामसँग मिल्ने अर्कै व्यक्ति को नागरिकता खारेज भएको सूचनामा आफ्नो फोटो राखेर राजपा सांसद राजेन्द्र महतोको नागरिकता खारेज भएको भन्ने प्रचार भएको विषयलाई लिएर महतोले सभामुख र नेकपा अध्यक्षको नामसँग जोडेका थिए ।
महतोले कृष्णबहादुर महरालाई महाडकैती मुद्दामा आजीवन काराबास भन्ने सूचनामा सभामुख महरालाई महाडकैती मुद्दामा आजीवन काराबास भयो भनेर समाचार आयो भने के हुन्छ भनी प्रश्न गरेका थिए । उनले पुष्पकमल दाहाल प्रचण्डको नाम लिदै गर्दा नेकपा सांसद अधिकारीले आपत्ति जनाएपछि उनी रोकिएका थिए ।
सांसद कृष्णभक्त पोखरेलले उदाहरण दिँदा सभामुख कृष्णबहादुर महराको नाम लिने कुरा स्वभाविक नभएको बताएका थिए । उनले संसदको मर्यादा र सम्मान पनि पर्याप्त नहुने र पुष्पकमल दाहालको नाम लिने कुरा पनि संसदीय अभ्यास र मर्यादाभित्र नपर्ने भन्दै रेकर्डबाट हटाउन माग गरेका थिए ।
त्यसपछि सभामुख महराले प्रतिनिधिसभा नियमावलीको दफा २१ को ख र ङ बमोजिम प्रतिकुल हुने गरी प्रयोग भएका शब्दहरु रेकर्डबाट हटाउन सचिवालयलाई निर्देशन दिएका थिए ।
