काठमाडौं । आइतबार बसेको प्रतिनिधि सभा बैठकको शून्य समयमा बोल्दै सांसद गगनकुमार थापाले शून्य र विशेष समयमा सदनमा उठेका विषयमा सम्बन्धित मन्त्रीले पाँच दिनभित्र सदनमा उपस्थित भई जानकारी गराउनुपर्ने नियमावलीकाे व्यवस्था कार्यान्वयन गर्न सभामुखको ध्यानाकर्षण गराएका छन् ।
विगतमा शून्य र विशेष समयमा उठेका विषय सम्बोधन भएनन् भनेर नियमावलीमा नै व्यवस्था गरिएको उल्लेख गर्दे उनले 'नियमको कार्यान्वयन किन नभएको ?' भन्दै सभामुखलाई प्रश्न गरे ।
त्यस्तै शून्य समयमा बोल्दै अन्य सांसदहरुले अन्य समसायिक र क्षेत्रगत विषयमा सम्बन्धित निकायको ध्यानाकर्षण गराएका छन् ।
सांसद अमृतादेवी अग्रहरिले कपिलवस्तुमा किसानले मलखाद र पानीको ठूलो अभाव झेल्नु परिरहेको भन्दै मलखाद र सिँचाइको तत्काल व्यवस्था गर्न माग गरिन् । उनले यसबारे पटकपटक कुरा उठाउँदै आएको भए पनि सरकारले बेवास्ता गरेको गुनासो गर्दै कान थुनेर र आँखा बन्द गरेर मुलुक चल्न नसक्ने भन्दै प्रधानमन्त्री र कृषिमन्त्रीलाई ध्यानाकर्षण गराइन् ।
सांसद कृष्णभक्त पोखरेलले सर्वसाधारणलगायत इच्छुक जनतालाई संघीय संसद् भवनभित्र निर्वाध प्रवेश गर्ने वातावरण बनाउन सभामुखको गम्भीर ध्यानाकर्षण गराए ।
सांसद खगराज अधिकारीले कालीगण्डकीको डाइभर्सन गर्दा केलादीघाट र देवघाट जस्ता पवित्र घाटहरु पानीबिनाका हुने भन्दै सरकारकाे ध्यानाकर्षण गराए । उनले चापाकोट रामपुर लगायतका टार सिँचाइ हुनबाट वञ्चित हुने तथा नारायणीमा पानीजहाज सञ्चालन गर्ने विषय पनि प्रभावित हुने भन्दै विषयवस्तुको गाम्भीर्यतातर्फ विचार गर्न सरकारको ध्यानाकर्षण गराए ।
सांसद गणेशकुमार पहाडीले मध्यपहाडी लोकमार्ग अन्तर्गत सिन्धुलीको खुर्कोट-घुर्मी सडकखण्डमा दोहोरो यातायात सञ्चालनका लागि आवश्यक पहल गर्न आग्रह गरे ।
