काठमाडौं । संसदीय समितिले वर्षात्का कारण क्षतिग्रस्त सडक तथा पुलहरूको मर्मतसम्भार तथा पुनर्निर्माणको काम तत्काल सुरु गर्न सरकारलाई निर्देशन दिएको छ ।
संघीय संसद्को विकास तथा प्रविधि समितिको आइतबार सिंहदरबारमा बसेको बैठकले वर्षात्का कारण क्षतिग्रस्त सडक तथा पुलहरूको जीर्णोद्धार तथा पुनर्निर्माणको काम तत्काल सुरु गर्न सरकारलाई निर्देशन दिएको हो ।
वर्षाका कारण आएको बाढी, पहिरो र डुबानले क्षतिग्रस्त बनाएको सडक र पुलहरूको जीर्णोद्धार तथा पुनर्निर्माण कार्य तत्काल सुरु गर्न भौतिक पूर्वाधार तथा यातायात मन्त्रालयलाई निर्देशन दिइएको समितिकी सभापति कल्याणी खड्काले जानकारी दिइन् ।
त्यसैगरी बैठकले संघ, प्रदेश र स्थानीय तहमा वर्गीकरण गरिएका क्षतिग्रस्त सडक तथा पुलहरूको जीर्णोद्धार तथा पुनर्निर्माण कार्य कसले बनाउने भन्ने अन्योल अन्त्य गरेर यथाशीघ्र ती सडकहरूको पनि निर्माण कार्यलाई तीव्रता दिन पनि सरकारलाई सचेत गराएको छ ।
सभापति खड्काले दसैं, तिहार, छठजस्ता चाडपर्वलाई समेत ध्यानमा राखेर वर्षात्ले क्षति पुर्याएका सडक तथा पुलहरू पूर्णरुपमा सञ्चालनमा ल्याई नागरिकलाई सहज यातायातको प्रत्याभूति दिलाउन पनि सरकारको ध्यानाकर्षण गराइएको जानकारी दिइन् ।
समितिले अध्ययनबिना जभाभावी सडक निर्माण सुरु गरेको पाइएको भन्दै राज्यको स्रोत, साधनको दुरुपयोग हुन नदिन र वातावरण विनास हुन नदिन पनि त्यस्ता गतिविधि तत्काल रोक्न पनि सरकारलाई निर्देश गरेको छ ।
बैठकमा समितिका सदस्यहरूले संघ, प्रदेश र स्थानीय सरकारको हानाथापका कारण वर्षाले क्षति पुर्याएका सडक तथा पुल निर्माणको काम अघि बढ्न नसकेको भन्दै सरकारको चर्को आलोचना गरेका थिए । समितिका सदस्य, प्रभु साहले तीन वटै तहको हानाथापका कारण क्षतिग्रस्त पुल तथा सडकको जीर्णोद्धार तथा पुनर्निर्माण कार्य अघि बढ्न नसकेको भन्दै आक्रोश व्यक्त गरे ।
समितिमा उठेका प्रश्नको जवाफ दिँदै भौतिक पूर्वाधार तथा यातायातमन्त्री रघुवीर महासेठले वर्षाले क्षति पुर्याएका सबै सडक तथा पुलहरूको मर्मतसम्भार र पुनर्निर्माणको कामको जिम्मेवारी सरकारले लिने बताए । उनले प्रदेश र स्थानीय तहको कार्य क्षेत्रमा परेका सडक तथा पुलहरूको निर्माणका लागि सम्बन्धित प्रदेश र स्थानीय सरकारसँग सहकार्य भइरहेको र त्यस्ता सडक तथा पुलहरूको निर्माण कार्यले छिट्टै गति लिने विश्वास दिलाए ।
बैठकमा मन्त्री महासेठले सडक डिभिजन अन्तर्गत वर्षात्का कारण ४५ वटा पुलमा क्षति भएको र त्यसको मर्मतसम्भार र निर्माणका लागि करिब ४७ करोड ३४ लाख बजेट लाग्ने जानकारी गराएका थिए ।
गत असार २६ गतेबाट लगातार तीन दिनसम्म आएको वर्षाका कारण आएको बाढी, पहिरो र डुबानबाट मुलुकमा मानवीय क्षतिसमेत भएको थियो ।
