हेटौँडा । प्रदेश नं–३ को प्रदेशसभा अन्तर्गत रहेको प्रदेश मामिला समितिले सूचनाको हकको व्यवस्था गर्न बनेको विधेयक २०७६ पारित गरेको छ । समितिको आज बसेको बैठकले उक्त विधेयक समितिमा पारित गरेर प्रदेशसभामा लैजाने तयारी गरेको हो ।
यसैबीच प्रदेशसभाका विभिन्न समितिमा छलफलका लागि रहेका पाँच वटा विधेयकमा दफावार छलफल चलिरहेको सत्तारुढ नेपाल कम्युनिष्ट पार्टी (नेकपा) संसदीय दलका प्रमुख सचेतक रामेश्वर फुयाँलले जानकारी दिए । उनका अनुसार आगामी भदौ ८ गते बस्ने प्रदेशसभाको बैठकमा केही विधेयक पारित गर्न छलफलका लागि ल्याइने भएको हो ।
प्रदेश सरकारले विसं २०७६÷७७ का लागि ल्याइएको नीति कार्यक्रम र बजेटमा उल्लेख भएअनुसार एकीकृत कृषि कार्यक्रम, पर्यटन क्षेत्रको विकास, राष्ट्रिय गौरव आयोजनाको निमार्ण गर्ने र प्रदेशका केही जिल्लामा नयाँ औद्योगिक क्षेत्रको स्थापनाका लागि तत्काल कार्ययोजना तर्जुमा गरी लागू गर्नेतर्फ प्रयास जारी रहने र दृृढताका साथ कार्यन्वय गर्ने लक्ष्य राखिएको सचेतक फुयाँलले बताए ।
