अतिरिक्त शुल्क फिर्ता गर्न प्रधानमन्त्रीले निर्देशन दिनुपर्छ–कोमल वली

काठमाडौं । नेकपाकी राष्ट्रिय सभा सदस्य कोमल वलीले मेडिकल कलेज सञ्चालकलाई अतिरिक्त शुल्क फिर्ता गर्न प्रधानमन्त्रीले नै निर्देशन दिनुपर्ने बताएकी छिन् ।

सोमबार राष्ट्रिय सभामा बोल्दै वलीले भनिन्– ‘चिकित्सा शिक्षा आयोगको अध्यक्ष प्रधानमन्त्री केपी शर्मा ओली हुनुहुन्छ । त्यसैले उहाँले नै शुल्क फिर्ता गर्न निर्देशन दिनुपर्छ ।’

उनले मेडिकल कलेज सञ्चालकहरूले अतिरिक्त शुल्क फिर्ता गर्ने प्रतिवद्धता जनाए पनि अहिलेसम्म विद्यार्थीले पैसा नपाएको बताइन् । यसबारे शिक्षा, विज्ञान तथा प्रविधिमन्त्री गिरिराजमणि पोखरेलले सदनलाई जानकारी दिनुपर्ने उनले बताइन् ।

यस्तै उनले उखु किसानका समस्यालाई जोड्दै किसानले पाउने रकम १५ दिन भित्र भुक्तानी नगरेमा सरकारले कारबाही प्रक्रिया अघि बढाउनुपर्ने बताइन् । उनले भनिन्– ‘किसानलाई दुःख दिएर, उनीहरुको रकम भुक्तानी नदिएर के गरेको ? यो तरिकाले सरकार र निजी क्षेत्रको सहकार्य कसरी अघि बढ्छ ?’

गरिब किसानमाथि भएको यस्तो अन्याय कुने हालतमा सहन नसकिने उनले बताइन् ।