काठमाडौं । विधायन व्यवस्थापन समितिबाट पारित भइ राष्ट्रिय सभामा पेश भएकाे 'मिडिया काउन्सिल विधेयक' काे बचाउमा सत्तापक्षका सांसद्ले र विराेधमा प्रतिपक्षी दलका सांसद्ले विचार राखेका छन् ।
मंगलबार संसद् भवन बाहिर कुरा गर्दै सांसद्हरुले विधेयकका बारे फरकफरक प्रतिक्रिया दिएका हुन् ।
प्रमुख प्रतिपक्षी नेपाली कांग्रेसका राष्ट्रिय सभा सदस्य राधेश्याम अधिकारीले पत्रकारको परीक्षा लिने जिम्मा दर्शक र स्रोतालाई दिनुपर्ने बताए । दक्षिण एसियाका कुनै पनि देशमा यस्तो अभ्यास नभएकाले नेपालमा पनि याे प्रावधान आवश्यक नरहेको उनको भनाइ छ ।
‘पत्रकारले कस्ताे गर्दैछ भन्ने जिम्मा पाठक, दर्शक र स्रोतालाई नै दिनुपर्छ’ –उनले भने –‘यस्ता अनुपयुक्त कुरामा हामीले अभ्यास गरिरहेका छौँ । जुन दक्षिण एसिया, बेलायत, अमेरिका कतै छैन ।’
त्यस्तै राष्ट्रिय जनता पार्टी (राजपा) नेता वृषेशचन्द्र लालले पत्रकारितालाई कुनै घेराभित्र राख्न नहुने धारणा राखेका छन् । मिडिया काउन्सिल विधेयक पत्रकारिता क्षेत्रलाई स्वस्थ र मर्यादित बनाउन ल्याइए पनि लाइसेन्स नै लिनुपर्ने प्रावधान राख्न नहुने विचार राखे ।
त्यस्तैगरी सत्तारुढ दल नेपाल कम्युनिष्ट पार्टी (नेकपा) का सांसद् दिनानाथ शर्माले पत्रकारहरुको ‘स्ट्याण्डर्ड’ कायम राख्न यो प्रावधान ल्याइएको बताए । पत्रकारका विषयमा धेरै प्रश्नहरु उठेको भन्दै उनीहरुकोे इज्जत माथि उकास्न पनि यो व्यवस्था गरिएको उनकाे तर्क छ ।
