काठमाडौं । सांसद् कालीबहादुर मल्लले शिवरात्रीका नाममा निर्वस्त्र हिंड्ने बाबा र गाँजा खाने प्रवृत्तिलाई नियन्त्रण गर्नुपर्ने बताए ।
बिहीबार राष्ट्रिय सभाको विशेष समयमा बोल्दै उनले धर्म र विज्ञानबीच बहस हुने गरेको स्मरण गरेका छन् । तर, अहिले शिवरात्रीका नाममा निवस्त्र हुने र गाँजा खाने कामले नेपालको सभ्यता र संस्कृतिलाई चुनौती दिएको भन्दै उनले यो प्रवृत्तिलाई नियन्त्रण गर्नुपर्ने विचार राखे ।
शिवरात्रीका दिनमा गाँजा तथा भाङ खान छुट दिने भए सधैंका लागि छुट दिनु पर्ने तर्क पेश गरे । गाँजा र भाङ खाने प्रवृत्तिले युवा जमातलाई बिगार्ने भएकाले यसलाई सुधार गर्नुपर्ने उनको भनाइ छ ।
यस्तै नाँगो हुँदैमा कोही भगवान नहुने भन्दै उनले संस्कृतको श्लोक सुनाउँदै भगवान आफ्नै मनमा हुने बताए ।
अर्को प्रशंगमा उनले महिला छाउ हुनुलाई महिलाको शरीर शुद्ध हुने प्रक्रिया रहेको बताए । छाउगोठ भत्काउने काम ठीक भएपनि पहिला चेतना बढाउन उपयुक्त हुने सुझाव उनले दिए ।
उनले छाउ मात्र नभइ बाेक्सी, दाइजाे जस्ता विकृति जन्य संस्कारकाे अन्त्य गर्नका लागि पूर्णकालिन प्रशिक्षण दिने टाेली खटाउन सुझाव दिए । कानुन र सचेतना सँगै गएमा यस्ता प्रवृति अन्त्य हुन सक्ने उनले बताए ।
