काठमाडौं । सांसद् रामनारायण बिडारीले ठूला भ्रष्टाचारीमाथि मुद्दा दायर हुनु खुसीको कुरा भएको बताएका छन् ।
राष्ट्रिय सभा बैठकमा बोल्दै उनले बालुवाटार जग्गा प्रकरणमा सरकार र अख्तियारलाई धन्यवाद् दिए । उनले भने– ‘मन्त्री, सचिव, ठूला घराना र धनाढ्यलाई कारबाही गर्न भ्रष्टाचारको मुद्दा लगाएर गज्जब गर्याे सरकारले, यसका लागि म सरकार र अख्तियारलाई धन्यवाद् दिन्छु ।’
तर वर्तमान सरकारले भ्रष्टाचारीलाई ठेगान लगाउन खोज्दा समेत सरकारको आलोचना गरिएको उनकाे गुनासाे छ । ठूला भ्रष्टाचारीलाई मुद्दा लागेपछि अब केही हुन्छ भन्नु पर्नेमा उल्टै विरोध गर्नुको कुनै औचित्व नभएको उनको भनाइ छ ।
सरकारले जे गरेपनि विरोध हुने गरेको भन्दै उनले भने– ‘कारबाही नगरे किन नगरेकाे, गरे अर्कोलाई किन नगरेको ? मेरो मान्छेलाई किन गरेको भनेर गुहार माग्छन् । गर्दै नगरे बर्बाद भयो भन्छन् ।’
भ्रष्टाचारमा कसैले एक्सन लिन नसक्ने अवस्थालाई वर्तमान सरकारले चिरेको भन्दै उनले भने– ‘भ्रष्टाचार गड्दा कसैले एक्सन लिने आँट गरेनन्, खुसी भएर बसे, केपी शर्मा ओली सरकारले त्यो भ्रष्टाचारको जरो निकाल्दा विरोध गरियो ।’
उनले प्रश्न गरे – ‘यसमा त सबै जना खुसी हुनपर्ने होइन र ? गज्जब गर्यो भन्न पर्ने हो नि ? विरोध किन ?’
वर्तमान सरकारले सुन तस्करहरुलाई पक्रेको, अपराधीलाई जेल हालेको र न्यायाधीसहरुलाई कारबाही थालेको उनले बताए ।
अहिले अख्तियारका प्रमुखहरु भ्रष्ट्राचार मुद्धाम, सभामुख, सांसद् र प्रहरीका हाकिम जेलमा रहेको भन्दै उनले भने– ‘अझैपनि खोई ठूला माछा भनेर उफ्रिन्छन्, कति ठूला माछा चाहिएको रैछ त । यो बुझ्न सकिएन ।’
