विराटनगर । अाफ्ना नेता विजयकुमार गच्छदारलाई बालुवाटार जग्गा लुट प्रकरणमा लागेकाे मुद्दाबाट जाेगाउन र चाेख्याउन नेपाली कांग्रेसले प्रदेश सभामा पनि बैठक अवरुद्ध गरेकाे छ । १ नम्बर प्रदेश सभाको आजको बैठक प्रमुख प्रतिपक्षी दल नेपाली कांग्रेसले अवरुद्ध गरेकाे हाे ।
गच्छदारलाई चाेख्याउन माग गर्दै कांग्रेसले प्रतिनिधि सभा बैठक पनि अवरुद्ध गरिरहेकाे छ । केन्द्र प्रदेश संसद्काे बैठक एउटै विषयमा एकसाथ स्थगित भएकाे याे पहिलाे पटक हाे ।
बैठक सुरु हुनासाथ कांग्रेसका सांसद्हरु उभिएर अवराेध थालेका थिए । सभामुख प्रदीपकुमार भण्डारीले पटकपटक बस्न आग्रह गर्दा पनि आफ्नो स्थानमा नबसेपछि कांग्रेसका सचेतक सूर्यमाराज राईलाई बोल्न समय दिएका थिए । उनले अख्तियार दुरुपयोग अनुसन्धान आयोगले एउटै प्रकृतिको मुद्दामा कसैलाई उन्मुक्ति दिने र कसैलाई मुद्दा लगाउने काम गलत भएको दावी गर्दै कारवाही प्रक्रिया नसच्याए लगातार सदन अवरोध गर्ने घोषणा गरे ।
त्यसपछि सभामुखले सोमबार २ः०० बजे बस्ने गरी बैठक स्थगित गरे ।
अाजकाे बैठकमा उद्योग, पर्यटन, वन तथा वातावरणमन्त्री जगदीशप्रसाद कुसियतले ‘प्रदेश वातावरण संरक्षण सम्बन्धमा व्यवस्था गर्न बनेको विधेयक’ सदनमा पेस गर्ने कार्यक्रम थियो ।
यसैगरी अख्तियार दुरुपयोग अनुसन्धान आयोगले पार्टीका उपसभापति विजयकुमार गच्छदारलाई मुद्दा लगाएकाेमा विराेध गर्दै चाेख्याउन माग राखेर कांग्रेस विराटनगर महानगरपालिका समितिले विरोध प्रदर्शन गरेकाे छ । समितिले विराटनगरको शनिहाटबाट विरोध र्याली निकाली स्थानीय हनुमान मन्दिर नजिककै कोणसभाको आयोजना गरेको थियो ।
