काठमाडौं । विश्वविद्यालय विश्वस्तरीय नै हुने भएकाले विश्वविद्यालयकाे परिभाषामा विश्वस्तरीय भनेर उल्लेख गर्न नपर्ने विचार सांसद्ले राखेका छन् ।
मदन भण्डारी विज्ञान तथा प्रविधि विश्वविद्यालयलाई विश्वस्तरीय विश्वविद्यालयको रुपमा परिभाषित गर्न आवश्यक नरहेको विचार सांसद् विन्दा पाण्डेले राखेकी हुन् । उनले बेलायतकाे हार्डवर्ड विश्वविद्यालय विश्वस्तरीय नलेखिए पनि एक नम्बरमा रहेकाे उदाहरण पेश गरिन् ।
आइतबार बसेको प्रतिनिधि सभा अन्तर्गतको शिक्षा तथा स्वास्थ्य समितिको बैठकमा मदन भण्डारी विज्ञान तथा प्रविधि विश्वविद्यालय सम्बन्धमा व्यवस्था गर्न बनेको विधेयकमाथिको दफावार छलफल भएकाे थियाे ।
छलफलमा सांसद् कल्याणीकुमारी खड्काले मदन भण्डारी विश्वविद्यालयलाई विश्वस्तरीय भन्नुको कारण स्पस्ट पार्न माग गरिन् । सबै विश्वविद्यालय विश्व स्तरको नै हुने भएकाले यसमा मन्त्रालय नै स्पष्ट हुनु पर्ने उनको भनाइ थियाे ।
यस्तै सांसद् खगराज अधिकारीले यो विशिष्ट प्रकारको विश्वविद्यालय भएकाले यसको उद्देश्य विज्ञान, प्रविधि र अनुसन्धानसँग सम्बन्धित हुनुपर्ने गरी विधेयक ल्याउनुपर्ने विचार राखे ।
सांसद् अन्जना विशंखेले परम्परासँग जोडिएका सीपलाई प्रविधिसँग जोडेर विश्वविद्यालयको विधेयक ल्याउनु पर्नेमा जोड दिइन् ।
सांसद् विरोध खतिवडाले विज्ञान तथा प्रविध विश्वविद्यालय भनिए पनि समाजशास्त्र, कानुन संकाय राखिएको भन्दै आलोचना गरे ।
त्यस्तै नेपाली कांग्रेस सांसद् चित्रलेखा यादवले विश्वविद्यालयको केन्द्रीय कार्यालय र विश्वविद्यालय फरक ठाउँमा राख्न नहुने विचार राखिन् । विश्वविद्यालयको केन्द्रीय कार्यालय पनि मकवानपुरको चित्लाङ्मा नै रहने गरी गरिएको संशोधन प्रस्ताव अनुसार नै व्यवस्था हुनुपर्ने उनको भनाइ छ ।
विधेयकमा विश्वविद्यालयको नेतृत्व प्रेसिडेन्सियल प्रणालीमा रहने उल्लेख गरिएकाले कस्तो व्यक्ति रहने भन्नेमा मन्त्रालयले स्पष्ट पार्नुपर्ने माग सांसद्ले राखे ।
