काठमाडौं । सेक्युरिटी प्रेस खरीद प्रकरणमा प्रतिनिधि सभाकाे सार्वजनिक लेखा समितका सदस्यहरु माथि नै अाराेप लगाइएकाे छ । खासगरी समितिमाथि सामाजिक सञ्जालमा व्यापक अाराेप लगाइएकाे छ । लेखामाथि लगाइएका आरोप छानविन गर्न सांसद्हरुले माग गरेका छन् । बिहीबार बसेको लेखा समितिको बैठकमा सांसदहरुमाथि लगाइएको आरोप छानविन गर्न सांसद्हरुले नै माग गरेका हुन् ।
बुधबार सञ्चार तथा सूूचना प्रविधिमन्त्री एवं सरकारका प्रवक्ता गोकुल बाँस्कोटाले कमिसन बार्गेनिङ गर्दै गरेको अडियो रेकर्ड सार्वजनिक भएसँग लेखा समिति माथि पनि प्रश्न उठाइएको थियो ।
सेक्युरिटी प्रिन्टिङ स्थापना प्रकरणलाई लिएर सामाजिक सञ्जालमा प्रश्न उठाइएको भन्दै यस्ता प्रश्नले समितिको विश्वसनियतामा आँच आउने भएकाले तत्काल छानविन गर्नु पर्नेमा उनीहरुको जोड छ ।समितिमा भएको छलफलमा विज्ञलाई बोलाइ उनीहरुको सुझाव अनुसार निर्देशन दिएकाले विनाकारण समिति सदस्यको चरित्र हत्या गर्ने काम भएको भन्दै आरोप लगाउने प्रयोगकर्तालाई कानुनी कारबाही गर्नुपर्ने उनीहरुको माग छ ।
जर्मनीकाे कम्पनीलाई काम दिनका लागि लेखा समिति सदस्यले पनि कमिसन खाने गरी सेटिङ गरिसकेका थिए भन्दै समितिका सदस्यहरुको तस्वीर सार्वजनिक भएको देखाउदै उनीहरुले सभापतिको ध्यानाकर्षण गराएका हुन् ।
सांसद सूर्य पाठकले आफूहरुको चरित्र हत्या गर्ने काम भएकाले कारवाही प्रक्रिया अघि बढाउन माग गरे । त्यस्तै नेपाली कांग्रेस सांसद डा.मिनेन्द्र रिजालले ‘७४ करोड होइन ४ अर्ब खाएर आज जर्मनीकाे कम्पनीलाई ठेक्का दिन थालेसी स्वीस एजेन्टले क्लिप बाहिर ल्याएको’ भन्दै प्रभात किशोर उपाध्यायको नाममा सामाजिक सञ्जालमा आफुहरुको तस्वीर पनि सार्वजनिक हुनु लेखा समिति माथिकै आक्रमण भएको भन्दै समितिले गम्भीरतापूर्वक लिनुपर्नेमा जोड दिए ।
समाजवादी पार्टी सांसद मोहम्मद इस्तियाक राईले पनि सांसद्को चरित्र हत्या गर्ने काम भएको भन्दै यस प्रकरणमा सार्वजनिक अडियोमाथि अध्ययन तथा अनुसन्धान गर्न माग गरे । त्यसैगरी धर्मशिला चापागाईले प्रिन्टिङ स्थापनाका सम्बन्धमा धेरै प्रश्न उठेकाले समितिले पनि यस विषयमा ध्यान दिनुपर्नेमा जोड दिइन । त्यस्तैगरी विज्ञको रुपमा समितिको छलफलमा उपस्थित स्वीस कम्पनीका स्थानीय एजेण्टले सार्वजनिक गरेको अडियोका सम्बन्धमा पनि समितिमा छलफल गर्नुपर्ने माग गरेका छन् ।
