काठमाडौं । नेपाली कांग्रेसका सांसद् डा. मिनेन्द्र रिजालले सञ्चार मन्त्रालय भित्रको भ्रष्टाचारबारे धेरै कुरा बोल्ने अपेक्षा पूरा भएन । प्रतिनिधि सभा बैठकमा कांग्रेसले बैठक अवरोध गरेपछि मुख्य वक्ताका रुपमा डा. रिजाललाई उभ्याएको थियो ।
विगतमा सञ्चार मन्त्री समेत रहेका डा. रिजाललाई मन्त्रालयभित्रको भ्रष्टाचार प्रकरणबारे धेरै कुरा थाहा भएको मानिन्छ । तर, उनले सञ्चार मन्त्रालयको भ्रष्टाचार प्रकरणमा सामान्य टिप्पणी मात्र गरे । उनी मुख्य रुपमा प्रधानमन्त्रीले मनाएको जन्मदिनको चर्चामा केन्द्रीत भए ।
उनले भने– ‘यति ठूलो भ्रष्टाचार यति लाजमर्दाे भ्रष्टाचार छ देशमा । भ्रष्टाचारले सीमा नाघेको छ । ७० करोड रुपैयाँ घूस दिनेले त्योभन्दा धेरै घुस दिनेलाई ठेक्का दियो भन्छ । योभन्दा लाजमर्दाे के हुन्छ ?’
उनले नेपाल ट्रष्टको सम्पत्ति यति होल्डिङलाई दिइएकोमा आपत्ति जनाए ।
प्रधानमन्त्री ओलीले आफ्नो गुटकालाई भ्रष्टाचारबाट जोगाएको र अरुलाई फसाएको टिप्पणी डा. रिजालले गरे । वाइड बडी जहाज खरीदमा अख्तियारले छानविन र कारवाही अगाडि नबढाएको उनले बताए– ‘सञ्चार मन्त्रालय आफैं ठूलो भ्रष्टाचारको अखडा बन्न पुगेको छ । स्याटलाइट काण्ड, ब्रोण्डव्याण्ड वितरण, फोरजी वितरण, अप्टिकल फाइबर, टेलिकम इजाजत सबैमा भ्रष्टाचार भएको छ ।’
सञ्चार मन्त्रालयमा खरबौं रुपैयाँको योजना भ्रष्टाचारका लागि तयार गरिएको उनले बताए ।
उनले भने– ‘प्रधानमन्त्रीज्यू, संसद्मा आउनुस्, जवाफ दिनुस् ।’ प्रधानमन्त्रीले संसद्लाई आश्वश्त गराउने विश्वाशका साथ बैठकमा अवरोध नगर्ने उनले बताए ।
