काठमाडौं । प्रतिनिधि सभा बैठकले प्रधानमन्त्री केपी शर्मा ओलीको स्वास्थ्यलाभको कामना गरेको छ ।
बैठकको सुरुमै सभामुख अग्निप्रसाद सापकोटाले विशेष प्रस्ताव प्रस्तुत गरेका हुन् । सो प्रस्ताव सर्वसम्मतीले पारित भएको छ ।
प्रस्तावमा भनिएको छ– ‘सम्माननीय प्रधानमन्त्री केपी शर्मा ओलीज्यूको आजै महाराजगञ्ज स्थित मनमोहन कार्डियोथेरासिक भास्कुलर एण्ड ट्रान्सप्लान्ट सेन्टरमा मृगौला प्रत्यरोपणको कार्य भइरहेकोमा प्रतिनिधि सभाको यो बैठक सम्माननीय प्रधानमन्त्रीको मृगौला प्रत्यरोपण कार्य सफलतासाथ सम्पन्न होस् भन्ने कामना गर्दछ ।
साथै उहाँको सीघ्र स्वास्थ्यलाभको समेत कामना गर्दछ ।’
प्रतिनिधि सभा बैठकले विरलै सर्वसम्मतिले प्रस्ताव पारित गर्दछ । सर्वसम्मतिले प्रस्ताव पारित हुँदा पनि प्रतिपक्षले टेबल धपधपाउँदैन । तर, प्रम ओलीको सुस्वास्थ्यको कामना गर्दै प्रस्ताव पारित गर्दा प्रतिपक्षी सांसद्हरुले पनि टेबल धपधपाएका थिए ।
