काठमाडौं । राष्ट्रिय अनुसन्धान विभागका कर्मचारीहरुको उमेर हद ६० वर्ष हुने भएको छ । राष्ट्रियसभाको विधायन व्यवस्थापन समितिमा बुधबार भएको छलफलमा विभागका कर्मचारीहरुको उमेरहद ६० वर्ष कायम गर्ने सहमति जुटेको हो ।
नेपाल विशेष सेवाको गठन र सञ्चालन सम्बन्धि संशोधन र एकीकरण गर्न बनेको विधेयकमाथिको छलफलमा उक्त सहमति जुटेको हो । उक्त प्रावधान लागु हुन भने अझै एक वर्ष कुर्नुपर्नेछ ।
समिति सभापति परशुराम मेघी गुरुङले २०७८ साउनबाट मात्रै उक्त प्रावधान लागु हुने बताए । सभापति गुरुङले विशिष्ठ श्रेणी एउटै तहमा ४ वर्ष र प्रथम श्रेणीको एउटै तहमा ६ वर्ष सेवा अवधि तोक्ने विषयमा पनि सहमति भएको जानकारी दिए ।
विधेयकका अन्य प्रावधानहरुमा छलफल गर्न बिहीबार पनि समितिको बैठक बोलाइएको छ ।
