काठमाडौं । प्रतिनिधि सभामा बाेल्दै नेकपा सांसद् जनार्दन शर्माले किसान, मजदूर र निम्न आय भएकालाई लक्षित गरी बजेट ल्याउन सुझाव दिएका छन् ।
आगामी आर्थिक ०७७-७८ का लागि विनियोजित विधेयकका सिद्धान्त र प्राथमिकताामाथिको छलफलमा बोल्दै शर्माले कोरोनाको प्रभाव कति हुन्छ भन्ने पूर्वानुमान नभएकाले किसान, मजदुर र निम्न आय भएका जनतालाई लक्षित गरी तत्काल काम अघि बढाउन बजेट ल्याउनुपर्ने बताए ।
उनले भने- ‘अहिले मुख्यगरी किसान, मजदुर, श्रमिकहरु र निम्न आय भएका जनताको प्रत्यक्ष सहभागिता गराउने कार्यक्रममा सरकारको लगानी बृहत् लगानी हुनुपर्छ, यसमा सरकारको तयारी छ कि छैन् ? कर्णाली, प्रदेश २ का जनता र सहरका श्रमिक र अन्य गरिबललाई स्मरण गरी बृहत् लगानी गर्नुपर्छ ।’
कोरोनाको समग्र प्रभाव अनुमान नगरी बजेट ल्याए भोलि संकट उत्पन्न हुन सक्नेतर्फ अर्थमन्त्रीको ध्यानाकर्षण गराउादै शर्माले राजनीतिक पार्टी, निजी क्षेत्र र सरोकारवाला सबैसाग छलफल गरी बजेट ल्याउन आग्रह गरे ।
शर्माले भने- ‘कोरोनाको प्रभावमा केन्द्रित भएर समाधान गर्नुभन्दा पनि सबै कुरा समेटिएको छ, अर्थमन्त्रालयको दिमाग उदार र वित्तीय पूँजीवादले भरिएको छ । व्यवहारमा नोकरसाही र दलाल पूँजीवाद हुर्किरहेको छ । तर सिद्धान्तमा समाजवाद भनेर मुर्ख बनाइँदै छ ।’
स्वाधिन अर्थतन्त्र निर्माणका लागि हरेक पालिकालाई आत्मनिर्भर बनाउन आधारभूत कार्यक्रमसहित अगाडि बढ्नुपर्ने बेला आएको उनले बताए । कम्तीमा पनि कृषि क्षेत्रमा १० प्रतिशत लगानी गरी कृषिमा आत्मनिर्भर हुने अभियानतर्फ अगाडि बढ्नुपर्ने उनले बताए ।
किसानलाई पेन्सन दिने, मल तथा बीउ किसानसम्म पुर्याउने कुरा प्राथमिकता दिनुपर्ने र प्राविधिक सेवा विस्तार गर्दै सहुलियत ऋण किसानको हात हातमा किसानको बारी बारीमा पुर्याउन सरकारलाई उनले सुझाव दिए ।
ठूला उद्योगपतिहरुले कृषिको नाममा ऋण लिएर अन्यत्र लगानी गरिरहेको अवस्थालाई रोक्न पनि किसानहरुको हात हातमा ऋण दिने व्यवस्था हुनुपर्ने उनले बताए ।
कृषि उपज राज्यले किन्ने सुनिश्चितता भएमात्रै कृषि क्षेत्रको विकास हुने र यसबाट आन्तरिक रोजगारी वृद्धि गर्न सहयोग पुग्ने उनले बताए ।
रुकुमको आठबीसकोट नगरपालिकामा श्रम सहकारीमार्फत १० दिनमा १० बेडको अस्पताल निर्माण गरिएको प्रसंग निकाल्दै शर्माले भने- ‘१० दिनमा ७ सय ५३ स्थानीय तहमा ७ हजार ५ सय ३० बेडको अस्पताल निर्माण गर्न सकिन्छ, एक महिनामा एक वडामा १ किलोमिटर बाटो निर्माण गर्यौँ भने एक वर्षमा १२ किलोमिटर नहर वा बाटो हामीले बनाउन सक्छौँ, यसरी ६ हजार ७ सय ४३ वटा वडामा १ किलोमिटरका दरले निर्माण गर्दा १२ महिनामा ८० हजार ९ सय १६ किलोमिटर बाटो नर्माण गर्न सक्छौँ ।’
शर्माले साना उद्योगमार्फत उत्पादन र स्वरोगजार बढाउन सकिने अवस्था रहेको र यसका लागि वैदेशिक रोजगारीबाट फर्किएकाहरुको सीप परीक्षण गरी श्रम सहकारीमा संगठित गर्न सुझाव दिए ।
