काठमाडौं । राष्ट्रिय सभा सदस्य जितेन्द्र नारायण देवले स्वास्थ्य क्षेत्रमा कम्तिमा १० प्रतिशत बजेट विनियोजन गर्नुपर्ने बताएका छन् ।
आगामी आर्थिक ०७७-७८ का लागि विनियोजित विधेयका सिद्धान्त र प्राथमिकता माथिको छलफलमा बाेल्दै उनले कुल बजेटको कम्तिमा १० प्रतिशत बजेट स्वास्थ्य क्षेत्रमा विनियोजन गर्नुपर्ने बताए ।
गरिब र तल्लो तहका जनतालाई भोकमरीबाट बचाउन २ खर्ब रुपैयाँको राहत प्याकेज घोषणा गर्नुपर्ने, कालोबजारी रोक्न बजार हस्तक्षेप गर्ने गरि योजना बनाउनुपर्ने उनले सुझाव दिए ।
स्वदेशमै वेरोजगार बनेका तथा विदेशबाट फर्कनेलाई रोजगारी श्रृजना गर्ने र कृषि उत्पादकत्व र रेमिट्यान्स बढाउने गरि प्राथमिकता निर्धारण गर्न समते उनले सुझाव दिए । चिकित्सा क्षेत्र र सुरक्षा निकाय थप मजबुत बनाउने गरि ती क्षेत्रमा बजेट बढाउनु पर्ने उनको भनाइ छ ।
सरकारका तर्फबाट डा. अर्थमन्त्री युवराज खतिवडाले प्रस्तुत गरेको बजेटका सिद्धान्त र प्राथमिकताले विषम र विशेष परिस्थितिलाई सम्बोधन गर्न नसकेको बताउँदै उनले तीनलाई रिस्ट्रक्चर र रिओरियण्ट गर्नुपर्ने बताए ।
उनले भने –‘सरकारले कोरोना भाइरसबाट श्रृजित समस्या सम्बोधन गर्ने गरि विनियोजित विधेयकका सिद्धान्त र प्राथमिकता निर्धारण गर्न सकेन ।’ कोरोनाले आक्रमण गर्नुभन्दा अगाडिको अवस्थामा यो दस्तावेज आएको भए यसमा कुनै नकारात्मक टिप्पणी गर्नुपर्ने अवस्था नबन्ने उनले बताए ।
उनले भने –‘कोरोनाले आक्रमण गरिसकेको अवस्थामा यो खालको दस्तावेज आउनु कताकता वामपन्थी पृष्ठभूमिका हाम्रा अर्थमन्त्री ज्यूले आफै पनि बामपन्थी साहित्यमा जेनेरल र पार्टिकुलर भनेको के हो ? विशिष्ठ अवस्था भनेको के हो > ठोस अवस्था भनेको के हो ? यो कुरा बुझ्नमा उहाँ कन्फुयुज हुनुभएकाे छ ।
साे दस्तावेज मन चिन्तित झोलाको रुपमा प्रस्तुत भएको बताउँदै उनले भने-'जहाँ जे पनि छ, के छैन यहाँ ? हरेक चिज छ यहाँ तर छरिएको छ, डाइलुसन छ, डिजेनेरेसन छ ।’ त्यसकारण सिद्धान्तलाई रिस्ट्रक्चर र रिओरियण्ट गर्नुपर्ने उनकाे भनाई छ ।
