काठमाडौं । अर्थमन्त्री डा. युवराज खतिवडाले बदलिंदो विश्व परिस्थिति, नयाँ आकांक्षा र आवश्यकताका आधारमा सरकारले बजेटका प्राथमिकता निर्धारण गरेको स्पष्ट पारेका छन् ।
राष्ट्रिय सभाको सोमबारको बैठकमा आगामी आर्थिक ०७७/७८ का लागि विनियोजित विधेयका सिद्धान्त र प्राथमिकताका अाधारमाथि सांसद्हरुले उठाएका प्रश्नको जवाफ दिँदै उनले वर्तमान परिस्थितिको सबै कोणबाट सम्बोधन हुने गरि सरकारले प्राथमिकता निर्धारण गरेको स्पष्ट पारे ।
सरकारले बजेटका प्राथमिकता समय, बदलिंदाे विश्व परिस्थिति, नयाँ आकाँक्षा र नयाँ आवश्यकताको आधारमा परिमार्जित गर्दै लैजाने समेत उनले स्पष्ट पारे ।
अहिलेको पहिलो चुनौती जीवनरक्षा भएको र जीवनरक्षाकै लागि आर्थिक गतिविधिलाई पनि सँगसँगै अघि बढाउने दिशामा सरकार उन्मुख भएको उनले बताए ।लकडाउनबीचमा अर्थतन्त्रलाई क्रमशः चलायमान बनाइने समेत उनले जानकारी दिए ।
सांसद्हरुले कोरोनाबाट प्रभावित भएको अर्थतन्त्रलाई माथि उठाउन कृषि क्षेत्रलाई प्राथमिकता दिन र स्वास्थ्य पूर्वाधारमा लगानी बढाउन दिएका सुझावलाई बजेट निर्माणका क्रममा मार्गदर्शनका रुपमा लिइने पनि उनले प्रतिबद्धता जनाए ।
पुरानै कार्यक्रम दोहोरिएको र कम्युनिष्टको सिद्धान्त अनुसार प्राथमिकता निर्धारण हुन नसकेको सांसद्हरुको आरोपको खण्डन अर्थमन्त्री खतिवडाले गरे ।
संविधानमा रहेका मौलिक हक र राज्यका निर्देशक सिद्धान्त पनि यथावत रहेको भन्दै उनले संविधानबाट निर्दिष्ट भएर पार्टीको सिद्धान्त अनुसार बजेटको सिद्धान्त र प्राथमिकता निर्धारण गरिएको स्पष्ट पारे ।
उनले भने- ‘यो नेपाल कम्युनिष्ट पार्टीको सरकार हो र तेश्रो बजेटको सिद्धान्त र प्राथमिकता मैले पेस गर्दैछु, हाम्रो पार्टीको सिद्धान्त परिर्वतन भएको छैन, हाम्रा प्राथमिकताहरु समयक्रममा नयाँ परिस्थितिको आधारबाट परिवर्तित भएका छन्, तर बर्षैपिच्छे पार्टीले सिद्धान्त फेरेर बजेट ल्याउँदैन ।’
सरकारको प्राथमिकता फेरिएको र स्वास्थ्य कृषिमा लगानी बढाएर रोजगारी वृद्धि गर्ने मार्गमा बजेट विनियोजन हुने उनले बताए । सरकारका दिर्घकालीन लक्ष्य हासिल गर्न तय कार्यक्रम एकवर्षपछि अर्को वर्ष छोड्न नमिल्ने भन्दै उनले सोही विषयलाई लिएर कार्यक्रम दोहोरियो भन्न नमिल्ने बताए ।
उनले भने- ‘पुरानै शैली भो, कार्यक्रम निरन्तर भए भन्ने कुरा पनि अतिसयुक्ती हो, हामीले सुरु गरेका राम्रा कार्यक्रम दुई बर्षमा जति गर्याैँ, सम्पन्न नभएका तेस्राे वर्ष छोड्ने हो र ? त्यो भन्दा हामी कहाँ पुग्छौ ? सम्मृद्ध नेपाल सुखी नेपालीको हाम्रो राष्ट्रिय आकांक्षा त पूरा भएको छैन नि, अनि त्यही नारा पुरानो भो । शैली पुरानो भो भन्यो भने हामी फेरि कहाँ पुग्छौ ?’
सीमा सुरक्षामा खटिने सुरक्षाकर्मीका लागि आवश्यक सुविधा तथा भौतिक पूर्वाधार विकासलाई सरकारले प्राथमिकतामा राखेको भन्दै उनले स्थानीय पूर्वाधार साझेदारी कार्यक्रमका बारेमा थप छलफल गर्ने बताए ।
बजेटका प्राथमिकताका सम्बधमा व्यापक छलफलको खाँचोको महशुस भएपनि प्रतिकूल अवस्थाले त्यसो गर्न नसकिएको उनले बताए ।
मन्त्री खतिवडाले विदेशमा रहेका नेपालीलाई बेवारिसे हुन नदिने र कूटनीतिक माध्यमबाट आवश्यक सहयोग गरिने बताए । तर सीमा खोल्ने वा आवागमन गर्ने कुरा जोखमयुक्त हुने बताउँदै उनले भने-'हामीले अन्य देशका उच्च तहमा कुरा गरेका छाैं, नागरिकलाई भाेकै बस्न नदिँने गरि काम भइरहेकाे छ ।'
