काठमाडौं। नेपाली कांग्रेसका सांसद् डाक्टर मिनेन्द्र रिजालले संसदीय गतिविधिसँग सम्बन्धित बैठकका निष्कर्ष संवैधानिक ढंगले सार्वजनिक गर्न माग गर्नुभएको छ ।
त्यस्ता बिषयमा सरकारको तर्फबाट प्रधानमन्त्री वा संसदीय व्यवस्था मन्त्रीले संसद्लाई जानकारी दिने परम्परा सुरु गर्न उहाँले माग गर्नुभएको छ ।
प्रतिनिधि सभाको बुधबारको बैठकमा बोल्दै रिजालले भन्नुभयो, ‘प्रधानमन्त्रीले बोलाएको सर्वदलीय बैठकले संविधान संशोधनको प्रस्ताव सबै दलको सहमतिमा छिटो प्रक्रियाबाट पारित गर्ने निर्णय भएको सुन्नमा आएकोछ, संसदीय गतिविधिसँग सम्बन्धी बैठक वा छलफलको निर्णयलाई पनि संवैधानिक ढंगले सार्वजनिक गरी संसदीय उत्तरदायीत्व पुरा गर्नु पर्दछ ।’
संसद्ले गर्ने निर्णय सांसद्ले औपचारिक रुपमा थाहा पाउनुपर्ने उहाँले बताउनुभयो ।
