काठमाडौं । प्रमुख प्रतिपक्षी नेपाली कांग्रेसले रुकुम पश्चिम घटना छानबिनका लागि गृह मन्त्रालयले बनाएकाे साधारण कर्मचारी नेतृत्वकाे समितिले न्याय दिन नसक्ने बताएकाे छ ।
साेमबार बसेकाे प्रतिनिधि सभा बैठकमा समय मागेर बाेल्दै कांग्रेस सांसद् मानबहादुर विश्वकर्माले गृहले गठन गरेको छानबिन समितिले न्याय दिनेमा विश्वास नरहेको बताउँनुभयाे । उहाँले साे समिति मान्य नहुने भन्दै दलित सांसद् सम्मिलित संसदीय छानबिन समित गठनको माग गर्नुभयाे ।
'घटनाको निष्पक्ष छानबिनका लागि दलित सांसद्को नेतृत्वमा तत्काल संसदीय समिति गठन गरियाेस्, समिति गठन नभए यो भन्दा कडा कदम चाल्न हामीलाई बाध्य नपारियोस ।’
साे घटनाका विषयमा संयुक्त राष्ट्रसंघले पनि निष्पक्ष छानबिन गर्न माग गरेकाले कांग्रेसले पनि संसदीय समिति गठन माग गरेकाे उहाँले स्पष्ट पार्नुभयाे । साे घटनालाई कमजाेर पार्न सत्तापक्षले आर्थिक चलखेल गरेको दाबी समेत विश्वकर्माले बताउनुभयाे ।
