काठमाडौं । सांसद्हरुले रुकुम चौरजहारी घटनाको छानविन गर्न अधिकार सम्पन्न संसदीय छानविन आयोग गठन गर्न माग गरेका छन् । प्रतिनिधि सभा बैठकको शुन्य समयमा बौल्ने सांसद्हरु सो माग गरेका हुन् ।
सांसद् गगनकुमार थापाले संविधानमा सबै हक लेखेपनि रुकुम घटनाले सबै नेपालीको मुखमा कालो पोतिएको बताउनुभयो ।
रुकुम लगायत लकडाउनको समयमा भएका दलित माथिका ३२ वटा अपमानवीय घटना अध्ययन गर्न संसदीय समिति गठन गर्न उहाँले माग गर्नुभयो । ‘समिति गठन नभएसम्म हामी माग गरिरहन्छौँ, न्यायको लडाईँ लडिरहन्छौँ’, थापाले भन्नुभयो ।
सांसद् कमाला रोकाले रुकुम घटना सामान्य घटना नभएको बताउनुभयो । त्यसकाे सत्यतथ्य छानविन गर्न उहाँले माग गर्नुभयाे ।
सांसद् कृष्णभक्त पोखरेलले रुकुम घटनाले सबैलाई लज्जित बनाएको बताउनुभयो । सांसद् खगराज अधिकारीले रुकुम घटनाका दोषीलाई कारबाहीको माग गर्नुभयो ।
सांसद् खेमराज लोहनीले कालापानी सहित मिचिएको सबै नेपाली भूमि फर्ता गर्न सरकारले पहल गर्नु पर्ने बताउँदै चौरजहारी घटनाका दोषीलाई पनि कडा बारबाही गर्नुपर्न माग गर्नुभयो ।
सांसद् झपडबहादुर रावलले सो घटनालाई मनवता विरुद्धको घटना भएको बताउनुभयो । रुकुम घटनाको निश्पक्ष छानवीन र दोषी माथि कारबाही हुनुपर्ने उहाँले माग गर्नुभयो ।
जाजरकोटको भेरी नगरपालिकाका युवा नवराज विक १९ जना युवासहित आफ्नी प्रेमिलाई लिन जेठ ९ गते रुकुमको चोरजहारी गएको बेला स्थानीयले आक्रमण गर्दा ५ जनाको ज्यान गएको थियो । सो घटनामा अझै एक युवा वेपत्ता छन् । अरु घाइते छन् ।
