काठमाडौं । अर्थमन्त्री डा. युवराज खतिवडाले बजेट लोकप्रिय हुँदै जाने डरले विरोध गर्नुभन्दा तथ्यमा कुरा गर्न आग्रह गर्नुभएको छ ।
प्रतिनिधिसभा बैठकमा बजेट विनियोजन विधेयक माथिको विचार गरियोस भन्ने प्रस्ताव माथिको छलफलमा उठेका प्रश्नहरुको जवाफ दिँदै अर्थमन्त्री खतिवडाले बजेट लोकप्रिय हुने डरले आलोचना नगर्न आग्रह गर्नुभयो ।
उहाँले भन्नुभयो, ‘संसदमा जब बजेट अलि राम्रो हुँदै जान्छ र लोकप्रिय हुँदै जाने बेला विरोध गर्नुपर्ने हो की ? होइन भने फ्याक्टमा कुरा गरौँ । बजेटले कहाँ राम्रो कहाँ नराम्रो गरेको छ भन्ने कुरा गरौँ । अहिलेको बजेट समग्रमा राम्रो भएको छ भन्ने मलाई लागेको छ ।’
छलफलमा सांसदहरुले बजेट महिलामैत्री नभएको भन्दै गरेको आलोचनाको अर्थमन्त्री डा. खतिवडाले खण्डन गर्नुभएको छ । महिला प्रत्यक्ष लाभ हुने, अप्रत्यक्ष लाभ हुने कुराहरु बजेटको अनुसूचीमा रहेको भन्दै उहाँले आफूलाई कुनै एउटा कुरामा चित्त नबुझ्दा समग्र महिलाको हितमा भएन भन्न नमिल्ने बताउनुभयो ।
त्यस्तै उहाँले सीमा क्षेत्रमा बोर्डर आउट पोष्टको क्षमता विस्तारका लागि बजेट बढाइएको बताउनुभयो । रक्षा क्षेत्रमा बजेट नबढाइएको बरु नेपाली सेना मार्फत हुने रणनीतिक आयोजनाहरुका लागि सम्बन्धित मन्त्रालय मार्फत बजेट गएको उहाँको भनाई छ ।
कोरोना संक्रमण नियन्त्रणका लागि चालु आर्थिक वर्षमा नै ५ अब रुपैयाँ निकासा भएको र कोरोना सम्बन्धित कोषमा २ अर्ब ३१ करोड रकम जम्मा भएको उहाँले बताउनुभयो । कोरोना महामारी नियन्त्रणलाई सरकारले प्राथमिकतामा राखेको भन्दै अर्थमन्त्री खतिवडाले सरकारले कुनै पनि स्वास्थ्य सामग्री अभाव हुन नदिने बताउनुभयो ।
