काठमाडौं । सांसद् सरिता गिरीले प्रतिनिधि सभामा गंगा चौधरीले बोलेको भारतीय चेलीको दादागिरी भन्ने शब्द सदन रेकर्डबाट हटाउन माग गर्नुभएको छ ।
प्रतिनिधि सभाको शुक्रबार बसेकाे बैठकमा समय लिएर बोल्दै सांसद् गिरीले चौधरीको सो मन्तव्यले सदनकै अपमान भएको बताउँदै रेकर्डबाट हटाउन माग गर्नुभयो ।
यसअघिको बैठकमा सांसद् चौधरीले नेपालको सदनमा भारतीय चेलीको दादागिरी बढेको अभिव्यक्ति दिनुभएको थियो ।
आफूले नेपालको सीमा विवाद समाधान गर्न भारत र चीन दुवै देशसँग छलफल गरेर अघि बढ्नपर्ने मात्र धारणा राखेको गिरीको भनाई छ । गिरीले पहाडका जनताको हल्लामा नचल्न पनि चाैधरीलाई आग्रह गर्नुभयो ।
चौधरीलाई चिनियाँ इसारामा चलेको आरोप लगाउन समेत उहाँले भ्याउनुभयो । ‘कतै चीनको इसारा अनुसार भारतीय चेलीलाई आरोप लगाएको त हाेइन’- आफ्नो आरोपको खण्डनमा चौधरीलाई आरोप लगाउँदै गिरीले भन्नुभयो ।
आफूलाई कसैले दया गरेर सांसद् बनाएको नभइ जनताको बीचबाट संघर्ष गर्दागर्दा सांसद् भएको उहाँले बताउनुभयो । उहाँले संसदको रेकर्डबाट सो मन्तव्य नहटाएसम्म सदन ठिक ढंगले चल्न नदिने समेत बताउनुभयो ।
गिरीको भनाइ सकिनासाथ बोल्नुभएकी अर्की सांसद् अमृतादेवी अग्रहरीले समेत सांसद् गंगा चौधरीले माफी माग्नुपर्ने बताउनुभयो । सांसद् हुनेले सबै प्रक्रिया पुरा गरी आएकाले अनावश्यक आरोप नलगाउन उहाँले आग्रह गर्नुभयो ।
संसद् रगत तताउने थलो नभएको उहाँले बताउनुभयो । संसद् कसैको अपमान गर्ने ठाउँ नभएको बताउँदै अग्रहरीले आफूहरुको बारम्बार अपमान हुने गरेको बताउनुभयो ।
कागजमा नक्सा कोर्दैमा नेपालको भूमि फिर्ता नआउने उहाँको भनाई थियो । पहाडी शासकले बेचेको नेपालको जग्गा फिर्ता लिन वार्ताको टेवलमा बस्नु पर्ने उहाँले बताउनुभयो ।
‘जग्गा बेचेर नौटंकी गर्दैमा नेपालको भूमि फिर्ता आउँदैन, यसका लागि कुटनीतिक वार्ता गर्नुस्, नसके कुर्सी छाड्नुस्, मधेशी त्यो कुर्सीमा बसेर नेपालको भूमि फिर्ता ल्याउँछन्’, अग्रहरीले भन्नुभयो
