काठमाडौं । उद्योग, वाणिज्य तथा आपूर्तिमन्त्री लेखराज भट्टले देशभित्रै उद्यमशीलताको विकास गरी औद्योगिक लगानीको प्रवद्र्धन गर्ने सोचका साथ सरकार प्रयासरत रहेको बताउनुभएको छ ।
विनियोजन विधेयक, २०७७ अन्तर्गत आफ्नो मन्त्रालयका बारेमा सांसद्हरुले उठाउनुभएको जिज्ञासाको जवाफ दिँदै उहाँले उद्यमशील जनशक्ति तयार पारी उत्पादन वृद्धि गरी व्यापार घाटा कम गर्ने लक्ष्यका साथ मन्त्रालयले काम गरिरहेको बताउनुभयो ।
कोरोनाका कारण मुलुकको उद्योग क्षेत्रमा परेको प्रभावलाई न्यून गर्दै उद्योगी, श्रमिक तथा आम उपभोक्ताको हितका लागि सरकारले उच्च प्राथमिकताका साथ नीति तथा कार्यक्रम र बजेटको विनियोजन गरेको उहाँको भनाई छ । सीमित बजेटका कारण सबैको माग सम्बोधन गर्न नसकिएकामा क्षमा माग्दै उहाँले बाँकी रहेका कार्यक्रम आगामी आवमा समावेश गर्ने बताउँनुभयो ।
औद्योगिक लगानीको विस्तारका लागि बजेट विनियोजन गरिएको जानकारी दिँदै उहाँले उद्योग क्षेत्रका लागि विनियोजन गरिएको बजेटको पूर्ण रुपमा कार्यान्वयन गर्ने लक्ष्यका साथ प्रक्रिया अगाडि बढाउने प्रतिवद्धता जनाउनुभयो । त्यसका लागि नीतिगत, प्रक्रियागत एवम् संस्थागत सुधारको कामलाई विशेष ध्यान दिइने दृढता उहाँले व्यक्त गर्नुभएको छ । स्थानीय कच्चा पदार्थ, पूँजी र सीपलाई प्रयोग गरी साना, मझौला तथा घरेलु उद्योगको विकासका लागि बजेट उपलब्ध गराइएको जानकारी दिँदै मन्त्री भट्टले आगामी आ.व.मा स्थानीय तहमा १३० औद्योगिक ग्राम स्थापना गरी रोजगारी अभिवृद्धि गरिने बताउनुभयो । सरकारले खाद्यान्नको समुचित वितरणका लागि सङ्घ तथा सबै प्रदेशमा गरी तीन लाख १० हजार मेट्रिक टन क्षमताको खाद्य भण्डारण गृह निर्माण गर्ने लक्ष्य राखेको उहाँले जानकारी दिनुभयो । मन्त्री भट्टले खाद्य भण्डारण गृह र बिक्री कक्ष स्थापना गर्दा किसान तथा उपभोक्ताले राहत पाउने समेत बताउनुभयो ।
यस्तै सार्क खाद्य सुरक्षा बैंक र राष्ट्रिय खाद्य सुरक्षा भण्डारणमा नेपालका तर्फबाट गर्नुपर्ने योगदानलाई बढाउने, आपूर्तिसम्बन्धी सार्वजनिक संस्थानको भण्डारण क्षमता विस्तार गरी खाद्य वस्तुको सहज उपलब्धता र मूल्य नियन्त्रण गर्ने लक्ष्यका साथ काम भइरहेको उहाँको भनाइ छ । आगामी वर्ष चोभार र रसुवाको टिमुरेमा सुख्खा बन्दरगाह, कैलालीको हरैयामा विशेष आर्थिक क्षेत्र, कञ्चनपुरको दोधारा–चाँदनीमा सुख्खा बन्दरगाहको निर्माण र हुम्लाको यारी, मुस्ताङको कोरला, सङ्खुवासभाको किमाथाङ्का तथा ताप्लेजुङको ओलाङचुङ्गोलामा व्यापार पूर्वाधार विकास कार्य अघि बढाइने मन्त्री भट्टले बताउनुभयो ।
स्वदेशी कच्चा पदार्थमा आधारित, उच्च मूल्य अभिवृद्धि गर्ने र निर्यातमूलक प्रकृतिका उद्योगको स्थापना र विस्तारलाई विशेष प्रोत्साहन गरिने जानकारी दिँदै उहाँले औद्योगिक क्षेत्र, विशेष आर्थिक क्षेत्र एवं औद्योगिक ग्राममा स्थापना हुने उद्योगलाई कर प्रणालीमार्फत थप प्रोत्साहन गरिएको बताउनुभयो ।
रुग्ण तथा बन्द उद्योगलाई निजी क्षेत्रसमेतको सहभागितामा थप लगानी, नवीन प्रविधिको प्रयोग र व्यावसायिक व्यवस्थापनका माध्यमबाट पुनरुत्थान गर्ने कामलाई प्रमुख प्राथमिकतामा राखिएको उहाँले बताउनुभयो । मन्त्रालयले उखु किसानको भुक्तानीको समस्या समाधान गरेको, किसानलाई राहत दिन न्यूनतम समर्थन मूल्य तोकिने भन्दै उहाँले आगामी आवका लागि धानको समर्थन मूल्य केही दिन भित्रै तोकिने जानकारी दिनुभयो । मन्त्री भट्टको जवाफमा चित्त नबुझेको भन्दै सांसदहरु प्रेम सुवाल, लक्ष्मणलाल कर्णले प्रतिप्रश्न गर्नुभएको थियो । सांसद कर्णले वीरगन्ज चिनी कारखाना, कृषि औजार कारखाना कहिले सञ्चालनमा आउँछ भनेर जिज्ञासा राख्नुभएको थियो । सांसद कर्णको जिज्ञासामा मन्त्री भट्टले ती उद्योग चलाउने विषयमा सरकारले आवश्यक तयारी गरिरहेको बताउनुभयो ।
