काठमाडौं । परराष्ट्रमन्त्री प्रदीपकुमार ज्ञवालीले अब अाउने पुस्ताले नाकाबन्दी नभाेग्ने गरी सरकारले काम गरेकाे बताउनुभएकाे छ ।
मन्त्रालयका लागि विनियोजित बजेट तथा कार्यक्रममा उठेका प्रश्नहरुको जवाफ दिने क्रममा उहाँले भन्नुभयाे - 'हाम्रै पुस्ताले तीन पटक भोगेको नाकाबन्दी अब भोग्नु पर्ने छैन, आर्थिक विकासको स्रोत पूर्ति गर्न कूटनीतिक निकाय सक्रिय छ ।'
नेपाल सानो छ भन्दैमा कसैसँग झुक्न नपर्ने गरी सरकारले काम सरकारले गरिरहेकाे बताउँदै उहाँले भन्नुभयाे - 'नक्सा जारी मात्र हाेइन सरकारले भूमि फिर्ता ल्याउन वार्ता गरिरहेकाे छ ।'
कुनै पनि देश भूगोल र जनसंख्याका आधारमा सानो र ठूलो नहुने भन्दै उनले आफ्नो सार्वभौमसत्ता रक्षा गर्न सरकार तयार रहेको बताउनुभयाे । विदेशमा अलपत्र सबै नेपालीलाई ल्याउन सरकारले पहल गरिरहेकाे बताउँदै उहाँले केहीलाई ल्याइसकिएकाे र अरुलाई ल्याउने क्रम जारी रहेकाे बताउनुभयाे ।
नेपालमा विभिन्न देशबाट भएका भ्रमणले नेपालको परराष्ट्र नीतिलाई थप उचाईमा पुर्याएको पनि उहाँले बताउनुभयाे । उहाँले संविधान अनुसार नै एमसीसी अगाडी बढाइने प्रतिबद्धता जनाउनुभयाे । नेपालले कसैसँग सहयाेग लिँदा कुनैपनि सैन्य र अन्य रणनीतिक गठबन्धनमा संलग्न नहुने बताउनुभयाे ।
सरकारको आलोचना गर्दा शब्द चयनमा ध्यान दिन पनि उहाँले अाग्रह गर्नुभयाे । विनियोजन विधेयकमाथिको छलफलमा सांसद् प्रदीप गिरीले सरकारले जारी गरेको विषयलाई लिएर ‘नक्साश्त्र’ शब्द चयन गरेकोमा उहाँलेआपत्ति जनाउनुभएकाे हाे ।
शब्दको जुनसुकै रुपमा प्रयोग भएतापनि यसले सरकारलाई केही फरक नपर्ने उहाँको भनाई छ । ‘अस्त्र’ शब्दले वैरभावको संकेत दिने भन्दै उहाँले नेपालको नशा-नशा शान्तिको भावले प्रभावित भएका कारण नेपालले कुनै पनि अस्त्रको परिकल्पना नगर्ने बताउनुभयो ।
सुगौली सन्धिबारे सांसद्ले उठाएका जिज्ञासामा उहाँले भन्नुभयो –‘नेपालको वर्तमान सीमा सुगौली सन्धि र तत्पश्चातका पूरक सन्धिहरुले निर्धिष्ट गरेको हो, सुगौली सन्धि यस्तो सन्धी होइन जसलाई सुन्दा हामीलाई गौरव होस् खुशी लागोस्, यो नेपालको हात तल परेपछि, नेपालको गरिमामा आँच पुगेपछि करिब एकतिहाई भूभाग गुमाएपछि गर्नुपरेको बाध्यात्मक सन्धि हो, यो यर्थाथ हो यस्ले नै नेपालको सीमा निर्धारण गरेको हो ।’
अर्का सांसद्ले नेपालको नक्सा प्रकाशन गरेको सन्दर्भलाई नाटक भन्नुभएको भन्दै उहाँले यस्ता शब्द चयन गर्ने कामले सरकारलाई कुनै फरक नपर्ने बताउनुभयो । शब्द चयन गर्दा आफू प्रतिनिधि सभाको सदस्य भएको भन्ने तथ्यले स्वंयको गरिमा घट्न सक्नेतर्फ उहाँले सचेत गराउनुभयाे ।
सांसद्ले भूभाग फिर्ताका लागि कूटनीतक पहल गर्न दिएको सुझाव अनुरुप नै सरकार सोही दिशामा ढृडता पूर्वक अगाडि बढेको उहाँले बताउनुभयो । आम नेपाली जनताको साथ र समर्थन बाट यस दिशामा सफलता प्राप्त हुने विश्वास लिइएको उहाँको भनाई छ ।
सीमा क्षेत्रको सुरक्षाका लागि गृहमन्त्रालय अन्य प्राविधिक कामका लागि भूमी व्यवस्था मन्त्रालय र कूटनीतिक आयाममा परराष्ट्र मन्त्रालययले समन्वयात्मक रुपमा काम गरिरहेको भन्दै उहाँले भूभाग फिर्ता भएसँगै त्यहाँ गरिने प्रशासनिक सुरक्षा र विकास सम्बन्धि कामहरु पनि अगाडि बढ्ने बताउनुभयो ।
