काठमाडौं । राष्ट्रिय सभा सदस्य दिनानाथ शर्माले अंग्रेजले लुटेको नेपालको भूमि भारतले सगौरव फिर्ता दिनुपर्ने बताउनुभएको छ ।
नेपालको संविधान दोस्रो संशोधन विधेयकमाथिको दफावार छलफलमा बोल्दै शर्माले भन्नुभयाे - 'अंग्रेजले हडपेको नेपालको दार्जिलिङ लगायत जमिन तपाईंहरूको नासो हो भन्दै भारतले सगौरव फिर्ता गर्नुपर्छ ।'
अंग्रेजले लुटेको भूमि फिर्ता गर्नुपर्नेमा नेपालको भूमि समेत कब्जा गर्नु भारतको विश्वासघाती चरित्र भएको पनि उहाँले बताउनुभयो । अंग्रेजले लुटेको भूमि फिर्ता मागेको नभई सुगौली सन्धिअनुसार महाकाली पश्चिम नआउन भनेर भारतलाई सतर्क गराइएकाे उहाँले बताउनुभयाे
भारतीय नेताहरूले नेपाललाई मित्र मान्ने भए साे भूमि फिर्ता गर्नुपर्ने भएपनि नेपालले पूर्वमा दार्जीलिङ र पश्चिममा काँगडासम्म नमागेकाे बताउनुभयाे ।
नेपाली भूमिमा बसेको भारतीय सेना फिर्ता हुनुपर्ने बताउँदै उहाँले भन्नुभयो - ‘नेपालको राष्ट्रियतामा नेपाली एक छन् भन्ने सन्देश गएको छ, यो निरन्तर कायम रहन्छ ।’ नेपाली एक ठाउँमा उभिएकाले नेपालको भूमि फिर्ता लिन सक्षम रहेको उहाँले बताउनुभयो ।
भारतको स्वतन्त्रताका लागि नेपालीले रगत बगाएको स्मरण गराउँदै शर्माले अंग्रेजले लुटेको नेपालको भूमि सहज रुपमा फिर्ता गर्नुपर्ने बताउनुभयो । भारत असल मित्र हो भने उसले आत्मियता देखाउनुपर्ने उहाँको भनाई छ । भारतीय जनताले समेत नेपालको भूमि फिर्ता गर्नुपर्ने बताइरहेको बेला भारतीय सेना सीमाबाट फिर्ता जानुपर्ने उहाँले बताउनुभयो ।
संवादबाटै सीमा समस्या हल गर्नुपर्ने पनि उहाँले बताउनुभयाे । नेपालको भूमि फिर्ता ल्याउने महत्वपूर्ण अवसर प्राप्त भएकोले यसमा सबैले एकमतले अघि बढ्न उहाँले आग्रह गर्नुभयो ।
नेपालको माटो रक्षामा मधेशको सबैभन्दा महत्वपूर्ण भूमिका रहेको भन्दै उहाँले सीमारक्षक मधेशी समुदायको भावना मर्न दिनु नहुने बताउनुभयो ।
