काठमाडौं । सांसद् नारायणकाजी श्रेष्ठले नेपालमाथि भारतले हेपाहा प्रवृति देखाएकाे बताउनु भएकाे छ । राष्ट्रिय सभा बैठकमा नेपालकाे संविधान दाेस्राे संशाेधन विधेयकमाथिकाे दफावार छलफलमा बाेल्दै उहाँले भन्नुभयाे -'नेपालमाथि हेपाहा प्रवृति देखाएर भारत वार्तामा बसेकाे छैन ।'
भारतले नेपालमाथि हेपाहा प्रवृति देखाई वार्तामा बस्न नचाहेको भन्दै उहाँले सीमाका विषयमा भारतले नेपालसँग वार्ता नगर्नु गल्ती भएको बताउनुभयाे ।
नेपालको भूमि मिचेर मानचित्र सार्वजनिक गरेको भारतलाई नेपालले पटक पटक कुटनीतिक वार्तामार्फत समस्या समाधान गर्न आग्रह गरेपनि भारतले नचाहेको उहाँले बताउनुभयो । भारतका थुप्रै कुटनीतिक व्यक्तिहरुले समेत नेपालसँग वार्ता नगर्नु भारतको गल्ती भएको बताएको भन्दै उहाँले भारतलाई ऐतिहासिक तथ्यको आधारमा निश्कर्षमा छिटो पुग्न आग्रह गर्नुभयो ।
देश राष्ट्रिय सार्वभौमिकता र भैगोलिक अखण्डताका विषयमा एकढिक्का भएको बताउँदै उहाँले भन्नुभयाे - 'राष्ट्रिय एकताले हामी सबैलाई उत्साहित बनाएको छ, मानचित्रको विषयमा सरकारको काम ऐतिहासिक पहल कदमी हाे ।'
गुमेको भूमि फिर्ता गर्न संविधान संशोधनमा मात्रै सीमित नभएर व्यवहारिक रुपमा फिर्ता गर्न पनि सबै एक हुनुपर्ने श्रेष्ठको भनाई छ । नेपालको मानचित्र सम्पूर्ण भूभाग समेटेर प्रकाशित गर्ने काममा मात्रै सीमित नभएको भन्दै उहाँले राष्ट्रिय एकतालाई, राष्ट्रिय संकल्पलाई सुदृढ गरेर व्यवहारिक रुपमा भूमि प्राप्त गर्ने विन्दु सम्म पुग्नको लागि एकतावद्ध भएर अघि बढ्न आग्रह गर्नुभयो ।
भारतले लिम्पियाधुरा, लिपुलेक र कालापानी लगायत क्षेत्र कब्जा गरेको सम्बन्धमा शासकहरुमाथि प्रश्न उठनु स्वभाविक भएको तर ती विषयलाई अहिले मुद्दाको रुपमा उठाएर राष्ट्रिय एकतालाई कमजोर बनाउने गतिविधि गर्न नहुने उहाँको भनाई छ ।
इतिहासमा विभिन्न कालखण्डमा सीमासम्बन्धि मुद्दामा वा राष्ट्रियताका विषयमा भएका कमीकमजोरी भएको भए आत्मआलोचना गरे स्वागत योग्य हुने बताउँदै उहाँ भन्नुभयाे - 'चालिएको कदमको अवस्थामा ती मुद्दालाई पनि सँगसँगै आरोप प्रत्यारोपको रुपमा लैजान हुँदैन ।'
