काठमाडौं । राष्ट्रिय सभा सदस्य राधेश्याम अधिकारीले कालापानीबाट भारतीय सेना फर्काउने लक्ष्यका साथ अघि बढ्नुपर्ने बताउनुभएको छ ।
राष्ट्रिय सभा बैठकमा नेपालको संविधान दोस्रो संशाेधन विधेयक माथिको दफावार छलफलमा बोल्दै सांसद् अधिकारीले भारतसँग वार्ता गरेरै सीमा विवादकाे विषयलाई समाधान गर्नुपर्ने बताउनुभयो ।
भारतले आफ्नो संसदबाट नक्सा जारी भएपछि पछाडी हट्न नसकिने बताइरहँदा नेपालको संसदले पनि आफ्नो नक्सा पारित गरेपछि वार्ताको समान हैसियतमा पुगिने उहाँले बताउनुभयो ।
कालापानीको विवादलाई बल्झाइरहेर नेपाल भारतको गहिरो मित्रतालाई भारतले नविगार्ला भन्ने लागेकाे भन्दै नेपाल पनि वार्तामा जानुपर्ने भएकोले बोलिबचनमा संयमता आवश्यक रहेकाे उहाँले बताउनुभयाे ।
कालापानी विवादलाई स्थानीयकरण गरी नेपाल भारतको मित्रतालाई अघि बढाउनुपर्ने उहाँकाे भनाइ छ ।
काली नदी पूर्वका भूभाग स्वत नेपालको भएकोले यसमा कुनै विवाद नभएको उहाँले बताउनुभयो । सुगौली सन्धिबाहेक अन्य कुराले नेपालको सिमानाको व्याख्या नगर्ने भएकोले यो कुरामा भारतले विवाद गर्नु नहुने उहाँले बताउनुभयो ।
राजाले २०१७ पुस १ गते संसद विघटन गरेको मौका छोपि नेपाली भूमि कब्जा गरेर बसेका भारतीय सेनाले त्यस बेलादेखि भोगचलन गरेको जग्गामा भारतले स्वामित्व नै खोज्नु गलत भएको उहाँको भनाई छ ।
