काठमाडाैं । प्रतिनिधि सभाका सांसद्हरूले लकडाउनका कारण असहज भएको दैनिकीलाई सामान्य बनाउन विशेष प्याकेजको व्यवस्था गर्न सरकारको ध्यानाकर्षण गराएका छन् ।
प्रतिनिधि सभाको मंगलबारको बैठकको शून्य समयमा बोल्दै सांसद्हरुले दैनिक कोरोनाका संक्रमितको संख्या बढीरहेकाले पीसीआर परीक्षणको दायरा बढाउन सरकारको ध्यानाकर्षण गराएका हुन् । त्यसैगरी क्वारेन्टीनलाई व्यवस्थित बनाउनुको साथै लकडाउन अवधि भरका लागि कर लगायतको छुट सहितको राहत प्याकेजको व्यवस्था गर्न पनि सरकारको ध्यानाकर्षण गराएका छन् ।
सांसद् बिमला नेपालीले क्वारेन्टीनमा बलात्कार, गाईगोठमा क्वारन्टीन जस्ता कुराहरु सुनिनु दुखद कुरा भएको भन्दै व्यवस्थिति क्वारेन्टीन बनाउनका लागि सरकारको ध्यानाकर्षण गराउनुभयो ।
सांसद मिन बहादुर विश्वकर्माले लकडाउन अवधि भरीको आर्थिक कारोवार र दायित्वबारे सर्वत्र विवाद, वहस र अन्योल देखिएकाले लकडाउन सुरु देखि अन्तिम सम्मको अवधिलाई शून्य समय मानेर सबै बर्गलाई राहत पुग्ने गरि प्याकेजको व्यवस्था गर्न सरकारको ध्यानाकर्षण गराउनुभयो ।
लकडाउन अवधि भरीको आर्थिक कारोवार र दायित्वबारे सर्वत्र विवाद, वहस र अन्योल देखिएकाले यसको समाधानका लागि सरकारले केही ठोस नीति लिनुपर्ने उहाँले बताउनुभयाे । 'त्यसका लागि लकडाउन सुरु गरेको मिति देखि अन्तिम दिन सम्मको शून्य समय मानौ र यो शुन्य समयमा व्यापार व्यवसाय रहेको घरधनीले घरभाडा नलिने निर्णय गरौ' उहाँले भन्नुभयाे ।
'घरधनीसंग बैकले व्याज नलिउँ । सो अवधिमा सरकारले कर नलिऔ । विद्यालयले विद्यार्थीसंग शुल्क नलिऔ' उहाँले भन्नुभयाे।
सांसद् मिना सुब्बाले निधन पछि मात्रै कोरोना परीक्षण गरिने, क्वारेन्टीनमा महिलामाथि बलात्कार हुनु लगायत घटनाले सरकार कोरोना भाइरस संक्रमणको जोखिम न्यूनीकरण र रोकथाममा चुकेको देखिएको बताउनुभयो ।
सांसद् भैरव बहादुर सिंहले सुदुरपश्चिममा भारतबाट आउने नेपालीहरुको संख्या बढ्दै गएको तर पीसीआर परीक्षणको रिपोर्ट आउन १५ दिन लाग्ने तथा संभावित जोखिम देखिएकाहरुको पनि समयमै परीक्षण हुन नसकेको भन्दै पीसीआर परीक्षणको दायरा बढाउन माग गर्नुभयो ।
सांसद् मनकुमारी जि सिले महिलाहरुको लागि छुट्टै क्वारेन्टीनको व्यवस्था गर्न माग गर्नुभयो ।
सांसद् भीमसेन दास प्रधानले कोरोनाको संक्रमण बढ्दै गएको तर लकडाउन खुकुलो बनाउँदा सवारी साधनहरुको चाप संगै सर्वसाधरणको चहलपहल बढेकाले सनिबार संगै आईतबार पनि सार्वजनिक विदा दिने व्यवस्था गर्न माग गर्नुभयो ।
सांसद् भरत कुमार शाहले सरकारले नेपाली श्रमिकलाई विदेश पठाउँदा १० हजार र ल्याउँदा १ लाख २२ हजार तोकेको भन्दै त्यस तर्फ सरकारको ध्यानाकर्षण गराउनुभयो । उहाँले खेती लगाउने समयमा मलखादको अभाव भएको भन्दै सर्वसुलभ मलखातको व्यवस्था मिलाउन सरकारको ध्यानाकर्षण गराउनुभयो ।
सांसद् बृजेश कुमार गुप्ताले सामुदायिक विद्यालयमा विभिन्न नाममा कार्यकर्ता भर्ना गर्ने काम भएको भन्दै सबै शिक्षकलाई हटाएर स्थानीय शिक्षक नियुक्तिको व्यवस्था मिलाउन सरकारको ध्यानाकर्षण गराउनुभयो ।
सांसद् भवानी प्रसाद खापुङ पाँचथर र तेहथुम जिल्लाको बीचका तमोर खोला लगायत स्थानमा लामो समयसम्म पुल बन्न नसकेको उल्लेख गर्दे पुल निर्माण लगायत सुरु गरिएको सडक निर्माण समयमै सम्पन्न गर्ने व्यवस्था मिलाउन आग्रह गर्नुभयो ।
सांसद् महेश्वर जंग गहतराज अथकले आत्महत्याका घटना र महिला हिंसा र जातिय विभेदका सामाजिक अपराध बढ्ने संभावना देखाएकाले सामाजिक अपराध अन्त्यका लागि सरकारले तत्काल ठोस कदम चाल्नुपर्ने बताउनुभयो ।
