काठमाडाैं । प्रत्यक्ष निर्वाचन प्रणालीले भ्रष्टाचार संस्थागत भएको सांसद्ले बताएका छन् ।
प्रतिनिधि सभाकाे राज्य व्यवस्था तथा सुशासन समितिमा भएको छलफलमा उनीहरूले प्रत्यक्ष निर्वाचन प्रणालीका कारण भ्रष्टाचार संस्थागत भएको बताएका हुन् । निर्वाचनमा उम्मेदवारले जसरी पनि जित्नैपर्ने मानसिकता बनाएका कारण अनावश्यक खर्च हुने र निर्वाचित भएपछि भ्रष्टाचार हुने गरेको उनीहरुको भनाई छ ।
सांसद् राजेन्द्र श्रेष्ठले निर्वाचनमा हुने अनावश्यक खर्च घटाउन निर्वाचन प्रणाली नै परिवर्तन गर्नुपर्ने बताउनुभयो । उहाँले समानुपातिक खुला सूचीमा आधारित निर्वाचन प्रणाली अपनाउनुपर्नेे बताउनुभयो ।
सांसद् दिलेन्द प्रसाद बडुले आफ्नो वार्षिक प्रतिवेदन पेस नगर्ने दलहरुको नाम र निर्वाचन खर्च नबुझाउने सांसद्को नाम सार्वजनिक गर्नुपर्ने बताउनुभयो । निर्वाचन प्रणाली सुधारका लागि दलिय सहमति गरेर अगाडी बढ्न सकिने उहाँले बताउनुभयो ।
सांसद् लालबाबु पण्डितले राजनीतिक पार्टीको कानून बनाउँदा आज हार्ने तर भोलि जनप्रतिनिधि भएर आउने परिपाटी अन्त्य गर्ने व्यवस्था हुनुपर्ने बताउनुभयो ।
सांसद् अमरेश कुमार सिंहले राजनीतिक दलसम्बन्धि ऐन कडा रुपमा आउनुपर्ने बताउनुभयो । कुनै पनि पार्टीमा पाँच वर्षभन्दा बढी एकै व्यक्तिले नेतृत्व गर्न नपाउने र ७० वर्ष उमेर नाघेका व्यक्ति निर्वाचनमा लड्न नपाउने व्यवस्था हुनुपर्ने उहाँले बताउनुभयो ।
सांसद् प्रेम सुवालले राष्ट्रिय दलको मान्यता प्राप्त गर्न र समानुपातिक सदस्यका लागि तीन प्रतिशत मत ल्याउनै पर्ने प्रावधान हटाउनुपर्ने बताउनुभयो ।
बैठकका प्रमुख निर्वाचन आयुक्त दिनेश कुमार थपलियाले आयोग अहिले निर्वाचनलाई मितव्ययी कसरी बनाउन सकिन्छ भन्नेमा गृहकार्य गरिरहेको बताउनुभयो । निर्वाचन प्रणाली आयोगले भन्दा नीति अध्ययन प्रतिष्ठानले गृहकार्य गरेर प्रस्ताव अगाडी बढाउने कुरा भएको उहाँले बताउनुभयो ।
