कामाडौं । 'अविश्वासको प्रस्तावबाट आफ्नै नेतालाई पराजित गर्ने कुरा मैले सोचेको थिइनँ, प्रधानमन्त्री एवं नेकपा अध्यक्ष केपी शर्मा ओलीमाथि अविश्वास प्रस्ताव लैजाँदा मलाई साेधिएन'- वामदेव गाैतमले भन्नुभयाे ।
राष्ट्रिय सभाको विशेष समयमा बोल्दै सांसद् गाैतमले यसअघि पनि प्रधानमन्त्रीमाथि पटक-पटक अविश्वासको प्रस्ताव लैजान खाेजिएकाे र विरोधी समूहमा रहेर पनि आफूले त्यसलाई फेल गराएकाे बताउनुभयाे ।
प्रधानमन्त्री ओलीको कटु आलोचक भएपनि उहाँविरुद्ध अविश्वास प्रस्ताव दर्ता गर्ने कुरा आफूले कहिल्यै नसाेचेकाे गाैतमले बताउनुभयाे । प्रधानमन्त्री ओली आफ्नाे ४३ वर्षदेखिकाे सहयाेद्धा भएकाे पनि उहाँले स्मरण गर्नुभयाे ।
प्रधानमन्त्री ओलीले पटक पटक आफूसँग एउटा कुरा भन्ने गर्नुभएकाे बताउँदै गाैतमले भन्नुभयाे - 'उहाँले मसँग पटक पटक भन्नुहुन्थ्याे, मलाई प्रधानमन्त्रीबाट हटाउन खोजियो भने दुर्भाग्य हुनेछ ।'
प्रधानमन्त्री ओलीले प्रतिनिधि सभा विघटन गर्दा एकपटक नसाेध्नुभएकाे उहाँले गुनासाे गर्नुभयाे । प्रधानमन्त्रीकाे ठाउँमा अहिले आफू भएको भए अविश्वास प्रस्ताव दर्ता गर्नुअगावै राजीनामा दिने समेत गाैतमले बताउनुभयाे । त्यसाे गरेकाे भए एकता जाेगिने उहाँकाे दाबी छ ।
पार्टी एकता जाेगाउन र नेताहरुकाे कार्यशैली सुधार्नका लागि पटक-पटक काेसिस गर्दा पनि नसकेकाे उहाँले स्वीकार गर्नुभयाे । तीन वर्षमै विभाजन हुने भए पार्टी एकता किन गरियाे भन्दै उहाँले प्रश्न गर्नुभयाे ।
पार्टीकाे जीवन अन्तरपार्टी संघर्षमा हुने बताउँदै नेकपा उपाध्यक्ष समेत रहनुभएका गाैतमले यसबाट कुनै पार्टी अछुताे हुन नसक्ने बताउनुभयाे । अन्तरपार्टी संघर्षकाे सामना गर्न सक्ने मानिस नै खास नेता बन्न सक्ने गाैतमकाे भनाइ छ ।
विघटन विरुद्ध सर्वाेच्चमा परेका रिट संवैधानिक इजलासमा रहेकाले विघटनलाई असंवैधानिक भन्न नमिल्ने सांसद् गाैतमले बताउनुभयाे । राष्ट्रिय सभामा आउन पाउँदा खुशी हुनुपर्ने भएपनि पार्टीकाे अवस्थाले खुशी हुन नसकेकाे उहाँले बताउनुभयाे ।
आफूलाई राष्ट्रिय सभामा मनाेनित गरेकाेमा उहाँले राष्ट्रपति,प्रधानमन्त्री र पार्टीका नेताहरुलाई धन्यवाद् दिनुभयाे ।
