काठमाडौं । आजबाट सुरु हुने प्रतिनिधि सभा बैठकमा नेकपा र प्रचण्ड समूहका सांसद् एउटै लाइनमा बस्ने भएका छन् ।
संसद् सचिवालयले बैठक सुरुहुनु अघि पत्रकार सम्मेलन गरी सो कुराको जानकारी दिएको हो । दलका आफ्ना विभिन्न विवाद, छलफल र आपसी बहस हुने भए पनि दल विभाजनको पत्र नआएकोले नेकपाका सांसद्लाई एउटै लाइनमा बस्ने व्यवस्था मिलाइएको संघीय संसद्का प्रवक्ता रोजनाथ पाण्डेले जानकारी दिनुभयो ।
व्यवहारगत रुपमा दुईवटा समूह देखिए पनि कानुनी रुपमा पार्टी विभाजन भएको जानकारी नआएको उहाँले बताउनुभयो । ‘नेकपाको दलको दुईवटा समूहको छलफल चलि रहेको अवस्थामा हामीकहाँ औपचारिक रुपमा दल विभाजनको पत्र प्राप्त नभएको र दल एउटै भएको अवस्थामा एउटै लाइनमा माननिय सदस्यलाई राख्ने व्यवस्था गरिएको छ’, उहाँले भन्नुभयो ।
उहाँले बैठक हिजो तय गरिएका कार्यसूची अनुसार नै अघि बढ्ने जानकारी दिनुभयो । आपसी सहमतिमा कार्यसूचीमा सामान्य हेरफेर हुनसक्ने उहाँले बताउनुभयो ।
संसदीय दलको नेताको हैसियतले प्रधानमन्त्री केपी शर्मा ओलीले नेकपा संसदीय दलको सचेतक परिवर्तन गरेको पत्र संसद् सचिवालयमा पठाउनु भएकोले उहाँलाई सचिवालयले सेवा दिएको उहाँको भनाइ छ ।
