काठमाडौं । प्रमुख प्रतिपक्षी नेपाली कांग्रेसले पछिल्लाे समय सरकारले ल्याएका महत्वपूर्ण अध्यादेश चाँडै पारित हुनुपर्ने बताएकाे छ ।
शुक्रबार बसेकाे प्रतिनिधि सभा बैठकमा बाेल्दै कांग्रेस प्रमुख सचेतक बालकृष्ण खाँडले पछिल्लो पटक सरकारले ल्याएका अध्यादेश जायज भएकाले चाँडै संदनबाट पारित हुनुपर्ने बताउनुभयो ।
‘सरकारले केही अध्यादेश ल्यायो, ती अध्यादेशहरु जरुरी पनि छन्, एसिड आक्रमणसम्बन्धी अध्यादेश सम्बन्धमा हाम्रो पार्टी तपाईंको साथमा छ, कोभिड-१९ को व्यवस्थापनका लागि पनि हामीले सधैं सरकारलाई रचनात्मक सहयोग गर्दै आएका छौँ’- उहाँले भन्नुभयाे ।
संविधानको विकल्प वर्तमान संविधान नै भएकाे बताउँदै खाँडले भन्नुभयाे - 'संसदीय व्यवस्थालाई बलियो बनाऔं, संविधानको कार्यान्यनमा प्रतिबद्ध बनाैं ।’
जायज विषयमा सरकारलाई सहयोग गर्ने बताउँदै खाँडले भन्नुभयो – ‘सदनलाई रचनात्मक ढंगले अगाडि बढाऔं, जनतामा नयाँ भरोसा र विश्वास पैदा गरौं, राजनितिक दलहरुमा भएका तिक्ततालाई कम गर्दै फेरी सहयात्रा र हातेमालो गरौँ भन्ने नै नेपाली कांग्रेसको चाहना हो ।’
वर्तमान सरकार गठन भएदेखि नै संविधानको मौलिक हक र लोकतन्त्रमाथि प्रहार थालेकाे आरोप लगाउँदै खाँडले अब सरकारसँग सत्तामा बसिरहने नैतिकता समाप्त भएको बताउनुभयाे ।
विघटनविरुद्ध सर्वोच्च अदालतको फैसलापछि प्रधानमन्त्री केपी शर्मा ओली पदमा बसिरहन उचित नहुँने बताउँदै उहाँले भन्नुभयाे - 'प्रधानमन्त्रीले विघटन गरेको प्रतिनिधि सभा पुर्नस्थापित भएपछि नैतिकता देखाउनुपर्छ कि पर्दैन ? सरकारले आफ्नो गलत कदलमको नैतिक जिम्मा लिनुपर्छ कि पर्दैन ?'-खाँडले प्रश्न गर्नुभयाे ।
