काठमाडौं । वाग्मती प्रदेशका मुख्यमन्त्री डोरमणि पौडेलले प्रदेश सरकारको सबै ध्यान कोभिड नियन्त्रणमा रहेको बताउनुभएको छ । प्रदेश सरकारले तदनुरुप नै क्रियाशिलता बढाएको उहाँले बताउनुभयो ।
सोमबार वाग्मती प्रदेश सभा बैठकलाई सम्बोधन गर्दै मुख्यमन्त्री पौडेलले कोभिड रोकथाम र नियन्त्रणका लागि ३१ करोड ८९ लाख रुपैँया विभिन्न अस्पताल तथा स्थानीय तहलाई पठाइसकिएको उहाँले जानकारी दिनुभयो । त्यस्तै वाग्मती प्रदेश अन्तर्गतका अस्पतालमा पीसीआर मेशिन राख्नका लागि २६ करोड रुपैँया निकासा भइसकेको उहाँले बताउनुभयो ।
विभिन्न अस्पतालको माग अनुसार ४ करोड ५० लाखको सामान खरिद गरी पठाइएको उहाँले जानकारी दिनुभयो । प्रदेशका अस्पतालको स्तर सुधारको लागि ५ करोड ५० लाख रुपैँया पठाइएको पनि उहाँले बैठमा जानकारी दिनुभयो ।
एक जर्मन संस्थाल १ करोड ६० लाख रुपैँया बराबरका सामाग्री समेत उपलब्ध गराएको उहाँले जानकारी दिनुभयो । प्रत्येक अस्पतालमा पाँच शैय्याका एचडीयू बेड राख्ने गरी काम अघि बढेको उहाँले बताउनुभयो ।
यसैगरी आइसीयू र भेन्टिलेटर थप्ने काम समेत निरन्तर भइरहेको उहाँले जानकारी दिनुभयो । वाग्मती प्रदेश सरकारको आगामी वर्षको नीति तथा कार्यक्रम र बजेट समेत कोरोना नियन्त्रणमा केन्द्रित हुने जानकारी गराउँदछु’, बैठकलाई सम्बोधन गर्दै मुख्यमन्त्री पौडेलले भन्नुभयो ।
राष्ट्रिय राजनीतिको कारण कोभिड नियन्त्रणको काम समेत केही प्रभावित भएको उहाँले स्वीकार्नु भयो । तथापि सो विषय अदालतमा पुगिसकेकोले अदालतले त्यसको निरुपण गर्ने उहाँले बताउनुभयो ।
जनताको अपेक्षाको कसीमा अझै धरै काम गर्न बाँकी रहेको उहाँले बताउनुभयो । ‘यी विषय हाम्रा राजनीतिक मूल्य र दृष्टिकोणसँग पनि गाँसिएका छन्’, उहाँले भन्नुभयो ।
मदनभण्डारी फाउण्डेसनलाई बजेट विनियोजन गरिएको विषयलाई लिएर बिरोध आएकोले सो रकम फिर्ता लिने निर्णय सरकारले गरेको उहाँले बैठकलाई जानकारी दिनुभयो । फाउण्डेसनलाई रकम छुट्याएको भन्दै कांग्रस लगायत प्रतिपक्षीले प्रदेश सभाको यस अघि भएको बैठक अवरुद्ध गरेका थिए ।
अन्य दिवंगत नेताको नाममा पनि बजेट विनियोजन भइरहेको अवस्थामा मदनभण्डारी फाउण्डेसनलाई छुट्एको रकमको मात्र विरोध भएको भन्दै मुख्यमन्त्रीले गुनासो गर्नुभयो । आगामि दिनमा यो विषयको मूल्याङ्कन हुने उहाँले बताउनुभयो ।
