काठमाडाैं । सुदूरपश्चिम प्रदेशका मुख्यमन्त्री त्रिलोचन भट्टले आज विश्वासको मत लिँदै हुनुहुन्छ ।
नेकपा एमालेले सरकारलाई दिएकाे समर्थन फिर्ता लिएपछि मुख्यमन्त्री भट्टले विश्वासकाे मत लिन लाग्नुभएकाे हाे । बिहान ९ बजे बस्ने प्रदेश सभा बैठकमा मुख्यमन्त्री भट्टले विश्वासकाे मत लिन लाग्नुभएकाे प्रदेश सभा सचिवालयले जनाएकाे छ ।
एमाले सुदूरपश्चिम प्रदेश कमिटीले मुख्यमन्त्रीको विपक्षमा मतदानका लागि सांसदहरुहलाई ह्वीप जारी गर्न प्रदेश सभा संसदीय दलका नेता र सचेतकलाई निर्देशन दिएको छ ।प्रदेश कमिटी अध्यक्ष कर्णबहादुर थापा र सचिव राजेन्द्र रावलले दलका नेता प्रकाशबहादुर शाह र सचेतक दुर्गाकुमारी विकलाई पत्र लेखेर पार्टीको स्थायी कमिटीको निर्णयअनुसार मुख्यमन्त्रीको विपक्षमा मतदान गर्न ह्वीप जारी गर्न निर्देशन दिनुभएको हाे ।
जेठ १० मा बसेको एमाले स्थायी कमिटी बैठकले समर्थन फिर्ता लिने निर्णय गरेको थियो । एमालेले समर्थन फिर्ता लिएपनि सुदूरपश्चिममा माधव गुटले मुख्यमन्त्री भट्टलाई साथ दिएकाे छ । समर्थन फिर्ता लिएपछि एक महिनाभित्र विश्वासको मत लिनुपर्ने संवैधानिक प्रावधान छ ।
५२ सदस्य रहेको सुदूरपश्चिम प्रदेश सभामा मुख्यमन्त्रीलाई विश्वासको मत प्राप्त गर्न २७ मत चाहिन्छ । प्रदेश सभामा एमालेका सभामुखबाहेक २४ जना छन् । जसमा माधव गुटका मात्र १५ जना छन् । माओवादीका १३, कांग्रेसका १२ र जनता समाजवादी पार्टी नेपालका २ जना सांसद् छन् । माधव गुटका सांसद्ले फ्लोर क्रस गरी मुख्यमन्त्री भट्टका पक्षमा मतदान गरे उहाँलाई विश्वास प्राप्त हुनेछ ।
