काठमाडाैं । गण्डकी प्रदेशका मुख्यमन्त्री गुरुङले प्रदेश सरकारले धेरै राम्रा कामहरु गरेका बताउनु भएकाे छ ।
बिहीबार सुरु भएकाे प्रदेश सभामा विश्वासको मत माग्दै मुख्यमन्त्री गुरुङले गुरुङले तीन वर्षको अवधिमा आफ्नो नेतृत्वको सरकारले समृद्ध प्रदेश निर्माणको बलियो आधारशिला निर्माण गरेको बताउनुभयाे । गण्डकी प्रदेश संघीयताको कोशेढुंगा बनेकाे समेत उहाँले बताउनुभयाे । संवैधानिक व्यवस्था र संघीयताको मर्म बमोजिम प्रदेश सरकारका सेवा प्रभावकारी रुपमा प्रवाह गर्ने काम पनि आफूले गरेकाे मुख्यमन्त्री गुरुङले बताउनुभयाे ।
प्रदेश सभाको पूर्ण कार्यकाल र संघीयताको सबलीकरणका लागि आफूलाई मत दिन उहाँ आग्रह गर्नुभयाे । मुख्यमन्त्रीले भन्नुभयाे - 'म प्रदेश सभा पूर्ण कार्यकाल चलोस् र संघीयता सबल होस् भन्ने चाहन्छु, यसप्रति प्रदेश सभा सदस्यहरुले विचार गर्नुहुने विश्वास लिएकाे छु ।' विश्वासको मत पाएमा सरकारको नीति तथा कार्यक्रम पेस गरी गण्डकी प्रदेशसभा बैठकमा बजेट पेस हुने बताउँदै उहाँले भन्नुभयाे - 'अन्यथा संवैधानिक व्यवस्था अनुसार अघि बढ्नुपर्ने व्यहोरा अवगत गराउन चाहन्छु ।'
संवैधानिक दायराभित्र रहेकाे राजनीतिक विवादकाे निरुपण गर्नुपर्ने उहाँले बताउनुभयाे । प्रदेश सभामा विपक्षी गठबन्धनको बहुमत पुग्ने सम्भावना नरहेको र यो तथ्य एक महिना अघि प्रमाणित भएको पनि उहाँले बताउनुभयाे ।
मुख्यमन्त्री गुरुङले विश्वासको मत पाए सबैलाई एकताबद्ध बनाएर लैजाने प्रतिबद्धता जनाउनुभयाे । एमाले दलहरुसँग सहकार्य गर्न तयार रहेको बताउँदै उहाँले भन्नुभयाे - 'प्रदेश सरकार पूर्ण कार्यकाल चलोस् भन्ने आशा राखेको छु ।'
