काठमाडौं । गण्डकी प्रदेश सभामा माओवादी संसदीय दलका नेता हरिबहादुर चुमानले अन्य प्रदेशको तुलनामा गण्डकी प्रदेशले केही बढी नै उपलब्धि हाँसिल गरेको बताउनुभएको छ ।
संघीय लोकतान्त्रीक गणतन्त्रात्मक संविधानलाई पच्छ्याएकोले गण्डकीले उपलब्धि हाँसिल गरेको उहाँले बताउनुभयो । बिहीबार गण्डकी प्रदेश सभा बैठकमा बोल्दै उहाँले प्राप्त उपलब्धिलाई मूल विषयमा प्रवेश गरेर हेर्नु पर्ने बताउनुभयो । ‘यो संघीय लोकतान्त्रिक गणतन्त्रबाट प्राप्त उपलब्धि हो’, उहाँले भन्नुभयो ।
बदलिँदो राजनीतिक परिस्थितिमा उहाँले सरकारमा जानको लागि माओवादी, कांग्रेस लगायतको गठबन्धन बनेको बताउनुभयो । सो गठबन्धलाई केही अप्राकृतिक गठबन्धन भनेका भए पनि आफूहरुले त्यसलाई प्राकृतिक बनाउने प्रयत्न गरिरहेको उहाँले बताउनुभयो ।
मुख्य कुरा राजनीतिक मुद्दा नै भएकोले राजनीतिक मुद्दाको पछाडि अरु सबै कुरा गौण हुने उहाँले बताउनुभयो । राजनीतिक मुद्दामा गठबन्धन एक ठाउँमा भएकोले अहिलेलाई एमाले नेतृत्वको सरकारलाई समर्थन गर्न नसकिने उहाँले बताउनुभयो ।
सर्वदलीय सरकार गठनको सम्भावना पनि कायम नै भएकोले त्यस विषयमा पनि पछि छलफल गर्न सकिने उहाँले बताउनुभयो ।
