सुदूरपश्चिम । प्रदेशसभाको आजको बैठकमा प्रदेश सरकारले आगामी आर्थिक वर्ष २०७८/०७९ का लागि ल्याएको नीति कार्यक्रममाथि छलफल सुरु भएको छ ।
छलफलमा भाग लिने सत्तापक्षीय सदस्यले नीति कार्यक्रमका बुँदाहरुमा धेरै राम्रा कुरा समेटिएको र समयसापेक्ष भएको भन्दै नीतिअनुसारको बजेट विनियोजन गर्नुपर्ने बताउनुभयो ।
उहाँहरुले सरकारले नीति कार्यक्रममा विगतमा सञ्चालन भएका योजनाको उपलब्धि देखाएको भए पनि योजनास्थलमा यस्ता धेरै योजनामा उपलब्धि नदेखिएको भन्दै योजनाको प्रभावकारी कार्यान्वयन गर्न ध्यान जानुपर्ने बताउनुभयो । छलफलमा भाग लिने सत्तापक्षीय सदस्यमा रतनबहादुर थापा, कुन्ती जोशी, लीलाधर भट्ट, महेशदत्त जोशी, माया तामाङ बोहरा, बलबहादुर सोडारी र कुलवीर चौधरी हुनुहुन्थ्यो ।
विपक्षी प्रदेशसभा सदस्यहरु गोविन्दराज बोहरा, भरतबहादुर खड्का र दिव्यश्वरी शाहले कोरोना महामारी र राजनीतिक अन्योलताले देश गम्भीर संकटमा परेको बेला ल्याइएको नीति कार्यक्रममा समेट्नु पर्ने विषय र मुद्दाहरु नसमेटिएको तर्फ सुझाव दिनुभयो । उहाँहरुले उपलब्ध साधन स्रोतको अधिकतम उपयोग गरी कार्यक्रम तथा योजनाको कार्यान्वयन गरेर परिणाम देखाउन सक्नु महत्वपूर्ण पक्ष हुने बताउनुभयो ।
यसअघि मुख्यमन्त्री त्रिलोचन भट्टले सरकारको नीति तथा कार्यक्रममाथि सभामा छलफल गरियोस् भनी पेश गर्नुभएको प्रस्तावलाई बैठकले सर्वसम्मतीले स्वीकृत गरेको थियो । नीति तथा कार्यक्रममाथि शनिबारसमेत छलफल हुने कार्यसूची छ । प्रदेश प्रमुख गङ्गाप्रसाद यादवले बिहीबारको प्रदेशसभा बैठकमा प्रदेश सरकारको नीति कार्यक्रम प्रस्तुत गर्नुभएको थियो ।
–रासस
