काठमाडाैं । वाग्मती प्रदेशका मुख्यमन्त्री डोरमणि पौडेलले कांग्रेस सांसद् नरोत्तम वैद्यमा दम्भ देखिएको बताउनु भएकाे छ ।
शनिबार बसेकाे प्रदेश सभा बैठकमा नीति तथा कार्यक्रममाथि उठेका प्रश्नकाे जवाफ दिने क्रममा मुख्यमन्त्री पाैडेलले त्यसाे भन्नुभएकाे हाे । प्रधानमन्त्री ओली विरुद्ध दिएकाे अभिव्यक्ति फिर्ता लिएपनि वैद्यले गल्ती गरेकाे महशुस नगर्नुभएकाे मुख्यमन्त्रीले बताउनुभयाे ।
संसदीय मर्यादालाई उल्लंघन गरेर देशको प्रधानमन्त्रीविरुद्व दिएको अभिव्यक्ति आपत्तिजनक भएको भन्दै मुख्यमन्त्री पाैडेलले वैद्यलाई मनैदेखि आफ्नो गल्ती महशुस गर्न आग्रह गर्नुभयाे । उहाँले भन्नुभयाे - 'उहाँले (वैद्यले) माफी त माग्नुभयो, तर, आफूबाट गल्ती भयो मैले गलत बोलेँ भन्नु भन्दा पनि मलाई पार्टीले भन्याे र निर्देशन दियो त्यसैले अभिव्यक्ति फिर्ता लिएँ, खासमा मेराे विचार अर्कै थियाे भन्नुले उहाँमा अझै दम्भ देखिन्छ ।'
यदि सत्तापक्षले वैद्यकाे जस्ताे अभिव्यक्ति दिएकाे भए प्रदेश सभामा ताेडफाेड भइसक्ने भन्दै मुख्यमन्त्री पाैडेलले आफूहरु सिस्टममा चल्ने भएकाले मर्यादित भएर बसेकाे बताउनुभयाे । मुख्यमन्त्री पाैडेलले भन्नुभयाे - 'संसदीय मर्यादा उल्लंघन गर्ने, मान्छे मार्ने ? प्रधानमन्त्रीलाई मार्ने ? अरूले नमार्ने भए मै मार्छु भन्ने उहाँमा कत्रो दम्भ ।'
शुक्रबार बसेकाे प्रदेश सभा बैठकमा नराेत्तमले प्रधानमन्त्री ओलीविरुद्ध नाथुराम गाेड्से बन्न आफू तयार भएकाे बताउनु भएकाे थियाे । चाैतर्फी आलाेचना र कारबाहीकाे माग भएपछि शनिबार प्रदेश सभा बैठककाे सुरुमै वैद्यले माफी माग्नुभभयाे ।
