काठमाडौं । नेकपा माओवादी केन्द्रका नेता दिनानाथ शर्माले नेकपा विभाजित हुनु र प्रतिनिधि सभा विघटन हुनुमा नेतृत्व जिम्मेवार रहेको बताउनुभएको छ ।
राष्ट्रिय सभाको बिहीबारको बैठकमा बोल्दै नेता शर्माले यसमा सबै जवाफदेही हुुनुपर्ने बताउनुभयो । तथापि यसको जिम्मेवारी भने नेतृत्वले लिनुपर्ने उहाँले बताउनुभयो ।
उहाँले अहिले देश गम्भीर संकटमा परेको बताउनुभयो । कोभिड, बाढी पहिरोसँगै लोकतन्त्र माथिको संकट देशले झेलिरहेको उहाँले बताउनुभयो । ‘यो संकट हाम्रो चिन्ताको विषय हो’, शर्माले भन्नुभयो ।
उहाँले दुईतिहाइको दम्भले नेकपा र प्रतिनिधि सभा विघटन हुन पुगेको बताउनुभयो । लोकतन्त्रको लागि संघर्ष गरेर रगत बगाए पनि नेपालका राजनीतिक दलमा लोकतान्त्रिक संस्कार विकास नभएको उहाँले बताउनुभयो । यसमा दलहरु असफल भएको उहाँले बताउनुभयो । ‘हाम्रो चरित्र लोकतान्त्रिक बनेको रहेनछ’,उहाँले भन्नुभयो ।
आफ्नो गुटका मान्छेलाई लिएर हिँड्ने संस्कृतिले लोकतन्त्रलाई क्षतविक्षत बनाएको उहाँले बताउनुभयो । यसको समिक्षा गर्नु पर्ने उहाँले बताउनुभयो ।
उहाँले अहिलेको शासन प्रणाली राष्ट्पति र प्रधानमन्त्रीय प्रणाली नभएको बताउनुभयो । अहिलेको प्रणाली संसदीय सर्वोच्चताको प्रणाली भएको उहाँले बताउनुभयो । नेतृत्वमा भएको वैचारिक अस्पष्टताको कारण अहिलेको अवस्था सिर्जना भएको भनाइ छ ।
उहाँले सहमति र सहकार्यको संस्कारलाई अगाडि बढाउन नसक्दा अहिलेको संकट आएको बताउनुभयो । अल्पमतले शासन गर्न नसक्ने र बहुमत नपुग्ने अवस्थामा सहमति र सहकार्यबाट अघि बढ्नु पर्नेमा उहाँले जोड दिनुभयो ।
