काठमाडौं । राष्ट्रिय सभा सदस्य रामनारायण बिडारीले अर्काको कुरा सुन्नै नसक्ने मानसिकताबाट सबैलाई मुक्त हुन आग्रह गर्नुभएको छ ।
बिहीबार राष्ट्रिय सभा बैठकको विशेष समयमा बोल्दै उहाँले अर्काको अस्तित्व स्वीकार्ने संस्कार विकास गर्न आग्रह गर्नुभयो । ‘बोलीका बिरुद्ध गोली र बिचारको विरुद्ध हतियार चलाउने तयार हुने मानसिकताबाट मुक्त हुनु पर्यो’, उहाँले भन्नुभयो ।
उहाले नयाँ सरकारलाई विकास निर्माणको काम अघि बढाउन र किसानको हितको निम्ति काम गर्न शुभकामना दिनुभयो । उहाँले विगतका सरकारले जनतालाई रैती बनाउने काम गरेको बताउनुभयो । ‘कहिले लालपुर्जा अड्काइ दिन्छ, कहिले सिफारिस अड्काइदिन्छ’, उहाँले भन्नुभयो ।
नयाँ संविधान बनेपछि जनता अलिअलि जनता बने पनि यथार्थमा अहिले पनि जनता जनता हुन नसकेको उहाँले बताउनुभयो । उहाँले नक्सा र नापी भएका जनताले पनि जग्गाधनी पूर्जा नपाएको उहाँका भनाइ छ । उहाँले सरकारलाई सुकुम्बासी खेती नगर्न सुझाव दिनुभयो ।
संसद्ले घुमाएर मत दिने भएकोले निर्वाचित जनाप्रतिनिधिले दिएको मत नै जनादेश हुने उहाँले बताउनुभयो । शेरबहादुर देउवाले प्रतिनिधि सभाका सदस्यको मतबाट विश्वासको मत प्राप्त गरेकोले त्यही नै जनादेश भएको उहाँको भनाइ छ ।
अदालतले आफ्नो पक्ष वा विपक्षमा जस्तोसुकै निर्णय गरेपनि स्वकार्नु पर्ने उहाँले बताउनुभयो । सर्वोच्च अदालतले गरेको फैसला विश्वको लागि उदाहरणिय नजिर भएको उहाँले बताउनुभयो ।
