काठमाडौं । प्रतिनिधि सभा सदस्य सुवास नेम्वाङले जनतालाई गतल सन्देश नदिन आग्रह गर्नुभएको छ ।
देश पश्चगमनमा फर्कन्छ भनेर भ्रम नफैलाउन उहाँले आह्वान गर्नुभयो । शुक्रबार प्रतिनिधि सभा बैठकमा बोल्दै नेम्वाङले भ्रम फैलाएर जनतालाई निराश बनाउन नहुने बताउनुभयो ।
विगतमा शेरबहादुर देउवाले सरकार चलाएको बेला झ्यालमा बसेको बालकलाई प्रहरीको गोली लागेर ज्यान गएको प्रशंग कोट्याउँदै उहाँले हिजो जस्तो दिन अब नदोहोर्याउन आग्रह गर्नुभयो । प्रधानमन्त्री शेरबहादुर देउवालाई शुभकामना दिँदै उहाँले अब फेरि विगतमा शेरबहादुरको पालामा जस्तै सांसद्हरु सिंहदरबारमा चेप्टिनु पर्ने अवस्था नआवस् भन्ने कामना गर्नुभयो ।
एमाले जिम्मेवार प्रतिपक्षी भएको बताउँदै उहाँले अहिले एमालेको ठाउँमा कांग्रेस र माओवादी भएको भए संसद् बैठक अवरुद्ध हुने उहाँको भनाइ छ ।
संविधानले निर्वाचन र निर्वाचित प्रतिनिधि सभाबाट प्रधानमन्त्री दिने व्यवस्था गरेको बताउँदै उहाँले पहिलो पटक देशले संसद् बाहिरबाट प्रधानमन्त्री पाएको बताउनुभयो । ‘जनदेशबाट होइन, सम्मानित सर्वोच्च अदालतको परमादेशबाट प्रधानमन्त्री हुनुभएको छ’, उहाँले भन्नुभयो ।
सर्वोच्च अदालतले गरेको यो फैसलाले धेरै प्रश्न उठाएको उहाँले बताउनुभयो । अदालतको फैसलाले लोकतन्त्र र सार्वभौमसत्तालाई कमजोर बनाएको उहाँले दाबी गर्नुभयो । ‘सर्वोच्च अदालतको फैसलाबाट राज्यको सन्तुलत बिग्रिएको छ, यसैगरी अघि बढ्दा राम्रो हुँदैन’, उहाँले भन्नुभयो ।
अदालतले दलीय सिस्टममा सांसद्लाई दलको ह्वीप नलाग्ने गरी गरेको निर्णय ठीक नभएको उहाँले बताउनुभयो । सांसद्लाई ह्वीप नलाग्ने अवस्थामा प्रतिनिधि सभा बैठकमा समेत पक्ष प्रतिपक्षको लागि छुट्टै बेञ्च नै आवश्यक नहुने अवस्था आउने उहाँको भनाइ थियो ।
उहाँले कांग्रेस पार्टीसँग सँधै सहयोग र सहकार्य हुने बताउनुभयो । तर कांग्रेस पार्टी भित्रका कुनै पनि गुटसँग कांग्रेसले जस्तो छुट्टै गठबन्धन नबनाउने उहाँले प्रष्ट पर्नुभयो । ‘त्यो बेठिक हो, त्यो गलत हो’, नेम्वाङले भन्नुभयो ।
एमाले भित्रको समस्या समाधानको लागि एमाले लागि रहेको उहाँले बताउनुभयो । यसमा अन्य दलको शुभकामना मात्र एमालेले खोजेको उहाँले बताउनुभयो । त्यो भन्दा माथि नजान उहाँले अन्य दललाई आग्रह गर्नुभयो ।
शेरबहादुर देउवालाई प्रधानमन्त्री बनाउने विषयमा कांग्रेस र माओवादीले दलगत निर्णय गरेको बताउँदै उहाँले आफ्नो पार्टी भित्र पार्टीको निर्णय खोज्ने तर अन्य पार्टीका सांसद्लाई पुछरमा झुन्याउने काम गरेको बताउनुभयो । त्यस्तै प्रधानमन्त्रीलाई मतदान गर्नको लागि पनि कांग्रेस र माओवादीले ह्वीप लगाएको उहाँले बताउनुभयो । ‘यो अनुशासन तपाईँका पार्टी भित्र चाहीँ लागु हुनुपर्ने, अरुलाई चाहीँ नलाग्ने भन्ने हो ? यो के गर्न खोजेको ?’ नेम्वाङले प्रश्न गर्नुभयो ।
सर्वोच्च अदालतको सांसद्लाई ह्वीप नलाग्ने फैसला पूर्णरुपमा गलत भएको बताउँदै उहाँले एमालेले त्यसको बिरोध गरिरहने बताउनुभयो । तै पनि जिम्मेवार राजनीतिक दलको हैसियतले अदालतको फैसलाको सम्मान र पालना एमालेले गर्ने नेम्वाङको भनाइ छ ।
नेम्वाङले सरकारलाई जनताप्रति जिम्मेवार हुन पनि आग्रह गर्नुभयो । ‘जनताको आदेशबाट आएको सरकार जनतासँग जोडिएको हुन्छ तर सर्वोच्च अदालतको आदेशबाट आएको सरकार जनतासँग जोडिन सक्दैन कि ?’ उहाँले प्रश्न गर्नुभयो ।
उहाँले सरका छिटो भन्दा छिटो प्रतिनिधि सभा अन्त्य गरेर अध्यादेश ल्याउने तयारीमा रहेको भन्ने कुरा आफूले सुनेको नेम्वाङले बताउनुभयो ।
उहाँले जतिसुकै अप्ठेरो भए पनि २५ भन्दाबढी मन्त्री र मन्त्रालय बनाउने तर्फ नसोच्न आग्रह गर्नुभयो ।
