काठमाडौं । नेकपा एमालेका अध्यक्ष केपी शर्मा ओलीले माओवादी केन्द्रका अध्यक्ष पुष्पकमल दाहाल प्रचण्डलाई जवाफ दिनुभएकाे छ ।
मंगलबार बसेकाे प्रतिनिधि सभा बैठकमा बाेल्दै अध्यक्ष ओलीले प्रचण्डकाे नाम नलिइ जवाफ दिनुभएकाे हाे । प्रचण्डले लगाएकाे डढेल निभाइएकाे बताउँलै उहाँले भन्नुभयाे -'सरकार परिवर्तन हुनासाथ सत्तापक्षका नेताले यसै राेष्टमबाट भन्नुभयाे - हाेसियार, म आगाे हूँ मसँग नखेल नत्र.. मलाई थाहा छ उहाँले विगतमा देशमा लगाएकाे डढेलाे म सम्झिन्छु, उहाँ आगाे हाे था छ,डढेलाे लगाउनुहुन्छ, तर एक-दुई बाल्टिन पानीले निभाएको पनि सम्झना रहाेस्,यस्ताे डढेलाे निभाउन हामीलाई पनि आउँछ,पानी खन्याएपछि निभाइन्छ ।'
प्रतिपक्षीलाई गाली गरेर राष्ट्रिय सहमतिकाे हल्ला गरिएकाे बताउँदै उहाँले भन्नुभयाे - 'केही दिन अघि सडकमा एउटा कागज वितरण गरेकाे देखेकाे थिएँ,त्यसमा राष्ट्रिय सहमति लेखिएकाे रहेछ, प्रतिपक्षलाई गाली गरेर,धम्क्याएर राष्ट्रिय सहमति ? नत्र...नत्र के गर्नुहुन्छ ?'
केही दिन अघि बसेको प्रतिनिधि सभा बैठकमा माओवादी प्रचण्डले आफू आगो भएकाले आगोसँग नखेल्न सचेत गराउनुभएकाे थियाे । ओलीले आज त्यसकाे जवाफ दिनुभएकाे हाे ।
विकासकाे रफ्तार बढाएर प्रतिपक्षीकाे भनाइलाई असफल बनाइदिन पनि उहाँले चुनाैती दिनुभयाे । तर सम्भव नभएकाे पनि उहाँले बताउनुभयाे ।
