काठमाडौं । राष्ट्रिय सभा सदस्य रामचन्द्र राईले देश र जनताको लागि काम गर्ने नेता केपी ओलीलाई तानावाना बुनेर हटाएको बताउनुभएको छ ।
बिहीबार राष्ट्रिय सभा बैठकमा बोल्दै पहिला पनि चारपटक प्रधानमन्त्री हुनुभएको शेरबहादुर देउवाले भ्रष्ट र अपराधीलाई संरक्षण गर्ने बाहेक कुनै पनि काम विगतमा नगरेको उहाँले बताउनुभयो । देउवा प्रधानमन्त्री भएको भोलिपल्टै भ्रष्टचार आरोपी विजय गच्छेदारलाई साधारण धरौटीमा छुटाउने व्यवस्था मिलाएको र मानवता विरुद्धका अपराधी अफ्ताब आलमलाई समेत छुटाउने तानावाना बुन्दै गरेको उहाँले बताउनुभयो ।
केपी ओली नेतृत्वको सरकारले भ्रष्टाचार गरेको आरोप लगाउनेलाई छानविन गरेर प्रमाणित गरी देखाउन पनि उहाँले चुनौती दिनुभयो । विगतमा देउवा सरकारको मन्त्री भएका कतिपय नेता भ्रष्टाचार प्रमाणित भएर जेल परेको उहाँले स्मरण गराउनुभयो ।
देउवा सरकार आउने वित्तिकै शदियौँदेखि दुःख पाउँदै आएका भूमिहीनलाई जग्गा दिने भूमि आयोग खारेज गरेर आफ्नो चरित्र उदाङ्गो बनाएको उहाँले बताउनुभयो । ‘शब्दजाल बनाएर यो सरकार जनताको भन्नु पर्दैन’, उहाँले भन्नुभयो ।
अघिल्लो सरकारको पालामा भएका विकासका काम नियमित प्रक्रिया अन्तर्गत नै भएका भन्नेलाई अघिल्लो सरकारले गर्न बाँकी रहेका काम सम्पन्न गरेर देखाउन पनि उहाँले आग्रह गर्नुभयो । अझै धेरै काम गर्न बाँकी भएकाले ती कामलाई नियमित प्रक्रियामा राखेर पूरा गरिदिन उहाँले सरकारलाई सुझाव दिनुभयो ।
