काठमाडौं । राष्ट्रिय सभा सदस्य भैरवसुन्दर श्रेष्ठले राम्रो काम गरेकै कारण केपी शर्मा ओलीको खुट्टा तानिएको बताउनुभएको छ ।
बिहीबार राष्ट्रिय सभा बैठकमा बोल्दै उहाँले जसले राम्रो काम गर्छ त्यसको खुट्टा तान्ने प्रवृत्ति हामी सबैको भएको बताउनुभयो । ‘राम्रो काम गरेकोलाई राम्रो भन्न सक्नु पर्छ, तबमात्र हामी बहादुर बन्छौँ, हामी इमान्दार बन्छौँ’, उहाँले भन्नुभयो ।
नेपालमा कहिल्यै पनि विकास हुँदैन भन्ने कुरालाई चिरेर समृद्ध नेपाल सुखी नेपालीको सपना केपी शर्मा ओलीले जगाएको उहाँले बताउनुभयो । ‘केपी शर्मा ओली समकालीन नेता मध्ये सबैभन्दा उत्कृष्ट हो, केपी ओली जनताको मरेका सपनालाई ब्यँुझाएर ल्याउने राजनेता हो’, उहाँले भन्नुभयो ।
उहाँले सर्वोच्च अदालतको परमादेश संविधानको अपब्याख्या गरेर आएको बताउनुभयो । ‘फैसला संविधानको मूल मर्म विपरित आएको भन्ने हाम्रो ठहर छ’, उहाँले भन्नुभयो ।
अदालतको फैसलाले बहुलवादको मर्ममाथि प्रहार गरेको उहाँले बताउनुभयो । फैसलाले शक्ति सन्तुलनका अंगलाई समेत हल्लाउने काम गरेको उहाँको भनाइ छ । यस्तो गतिविधिले संसदीय व्यवस्था नै समाप्त हुने हो कि भन्ने जोखिम बढेको उहाँले बताउनुभयो ।
श्रेष्ठले अहिलेको सरकार प्रतिगमनकारी भएको पनि बताउनुभयो । प्रतिगनबाट जन्मिएको सरकारले काम पनि प्रतिगनमकारी नै गर्न सुरु गरेको उहाँले बताउनुभयो । ‘प्रतिगमन आफूले गर्ने, विरोध केपी ओलीको गर्ने’, उहाँले भन्नुभयो ।
