काठमाडाैं । लुम्बिनी प्रदेशमा विपक्षी गठबन्धनले आज मुख्यमन्त्रीमा दाबी पेस गर्दैछ ।
नयाँ सरकार गठनका लागि नेपाली कांग्रेस,माओवादी केन्द्र, जनता समाजवादी पार्टी (जसपा) र राष्ट्रिय जनमोर्चासहितको गठबन्धनले आज दाबी पेस गर्न लागेका हुन् ।मुख्यमन्त्री शंकर पोखरेलले बुधबार दिनुभएकाे राजीनामा स्वीकृत गर्दै प्रदेश प्रमुख अमिक शेरचनले बहुमतको सरकार गठन गर्न आह्वान गर्नुभएकाे छ ।
दुई वा दुईभन्दा बढी दलहरूको समर्थनमा बहुमत प्राप्त गर्न सक्ने प्रदेश सभा सदस्यलाई मुख्यमन्त्री नियुक्त गर्ने प्रयोजनका लागि प्रदेश प्रमुख शेरचनले आज दिउँसाे ३ बजेसम्मकाे समय दिनुभएकाे छ ।
विपक्षी गठबन्धनले माओवादी केन्द्र संसदीय दलका नेता कुलप्रसाद केसी (सोनाम) लाई नयाँ मुख्यमन्त्रीको रूपमा अघि सारेको छ । कांग्रेस र माओवादीबिच ८-८ महिना सरकारको नेतृत्व गर्ने सहमति समेत भएकाे बताइएकाे छ ।
